ព្រះអម្ចាស់នឹងប្រទានថ្វីមាត់ និងប្រាជ្ញាដល់អ្នកសម្រាប់គ្រប់ស្ថានភាពទាំងអស់ក្នុងជីវិតរបស់អ្នក
ព្រះចង់ឲ្យអ្នកជឿទាំងអស់ទទួលបានព្រះវិញ្ញាណនៃប្រាជ្ញា។ ការមានព្រះវិញ្ញាណបរិសុទ្ធនៅក្នុងអ្នកគឺជារឿងមួយ ប៉ុន្តែជារឿងផ្សេងមួយទៀតក្នុងការមានព្រះវិញ្ញាណបរិសុទ្ធធ្វើការ ជាព្រះវិញ្ញាណនៃប្រាជ្ញានៅក្នុងជីវិតអ្នក។
ដូច្នេះព្រះប្រាជ្ញាញាណរបស់ព្រះនឹងធ្វើការ គ្មានបញ្ហាណាដែលមិនអាចដោះស្រាយបានទេ។ គ្មានកិច្ចការដ៏លំបាកណាដែលមិនអាចសម្រេចបាននោះទេ។ ព្រះប្រាជ្ញាញាណរបស់ព្រះយកឈ្នះលើបញ្ហាទាំងអស់។ ព្រះគម្ពីរថែមទាំងចែងថា ដ្បិតសេចក្ដីល្ងង់ល្ងើរបស់ព្រះនោះមានប្រាជ្ញាលើសជាងមនុស្ស! (១ កូរិនថូស ១:២៥)
មនុស្សម្នាក់អាចមានការអប់រំល្អ និងពោរពេញដោយចំណេះដឹង ប៉ុន្តែនៅតែខ្វះប្រាជ្ញា។ នៅពេលដែលខ្ញុំកំពុងបំពេញការងារបម្រើជាតិ ខ្ញុំបានកត់សម្គាល់ឃើញមន្ត្រីវេជ្ជសាស្ត្រម្នាក់តែងតែជក់បារី។ ជារឿងចម្លែកណាស់ដែលឃើញវេជ្ជបណ្ឌិតជក់បារី។ គាត់មានចំណេះដឹងច្រើន រៀនបានច្រើន ប៉ុន្តែគ្មានប្រាជ្ញា។
ដូច្នេះ ចូរស្វែងរកប្រាជ្ញា។ ចូរចាត់ទុកវាជាអាទិភាព។ នៅពេលដែលអ្នកលើកតម្កើងប្រាជ្ញា ដែលព្រះគម្ពីរពិពណ៌នាថាជាស្ត្រី ហើយឱបក្រសោបនាង នោះនាងនឹងលើកកម្ពស់អ្នក និងផ្ដល់កិត្តិយសដល់អ្នក។ (សុភាសិត ៤:៧-៨)
មានវិធីល្អជាងនេះ
នៅកន្លែងធ្វើការរបស់អ្នក អ្នកមិនចាំបាច់លើកកម្ពស់ខ្លួនឯងដោយធ្វើតាមប្រព័ន្ធនៃពិភពលោកទេ។ អ្នកមិនចាំបាច់បង្ខំចិត្តធ្វើការហួសម៉ោងគ្រប់ពេលនោះដែរ។ អ្នកមិនចាំបាច់យកចិត្តចៅហ្វាយរបស់អ្នក ឬសម្របសម្រួលសីលធម៌ និងគុណតម្លៃរបស់អ្នក ដើម្បីឡើងជណ្ដើរនៃភាពជោគជ័យនោះទេ។ មានវិធីល្អជាងនេះ។ មានវិធីរបស់ព្រះក្នុងការដោះស្រាយ ដែលហៅថា ប្រាជ្ញារបស់ព្រះ។
មានមនុស្សដែលចំណាយសុខភាពទាំងអស់របស់ពួកគេដើម្បីបានទ្រព្យសម្បត្តិ។ បន្ទាប់មក ពួកគេចំណាយទ្រព្យសម្បត្តិទាំងអស់របស់ពួកគេដើម្បីបានសុខភាពរបស់ពួកគេមកវិញ! នោះមិនមែនជារឿងវៃឆ្លាតទេ។
Aព្រះគម្ពីរចែងថា «ដៃរបស់មនុស្សឧស្សាហ៍ព្យាយាម ធ្វើឲ្យមានបាន»។ (សុភាសិត ១០:៤) ប៉ុន្តែការឧស្សាហ៍ព្យាយាមនៅក្នុងកណ្ឌគម្ពីរសុភាសិតមិនមែននិយាយអំពីការខិតខំប្រឹងប្រែង និងធ្វើការយ៉ាងលំបាករហូតដល់អ្នកមិនមានពេលសម្រាប់គ្រួសាររបស់អ្នក ហើយអ្នកក៏មិនមានពេលវេលានៅជាមួយព្រះនៅក្នុងដំណាក់របស់ព្រះដែរ។ នោះមិនមែនជាការឧស្សាហ៍ព្យាយាមទេ ប៉ុន្តែជាការខិតខំធ្វើការ។ ការឧស្សាហ៍ព្យាយាមមានជាប់ទាក់ទងនឹងព្រះប្រាជ្ញាញាណរបស់ព្រះ។ ព្រះមានប្រាជ្ញាសម្រាប់គ្រប់ស្ថានភាពដែលអ្នកប្រឈមមុខ។ ហើយប្រាជ្ញារបស់ទ្រង់នឹងនាំអ្នកឆ្លងផុត និងផ្តល់ឲ្យអ្នកនូវភាពជោគជ័យដ៏ល្អដោយមិនចាំបាច់ប្រឹងប្រែងអ្វីទាំងអស់។
ក្មេងៗរបស់យើងត្រូវការប្រាជ្ញា
ឪពុកម្តាយអើយ វាជាការល្អក្នុងការបង្រៀនកូនៗរបស់អ្នកថា រឿងដំបូងដែលត្រូវទូលសុំពីព្រះជារៀងរាល់ថ្ងៃគឺប្រាជ្ញា។ ព្រះគម្ពីរបានចែងថា ព្រះកុមារយេស៊ូវបានចម្រើនឡើងខាងប្រាជ្ញា បន្ទាប់មកខាងរូបកាយ និងជាទីគាប់ព្រះហឫទ័យរបស់ព្រះ និងមនុស្ស។ សូមកត់សម្គាល់ថា រឿងនេះបានកើតឡើងបន្ទាប់ពីព្រះយេស៊ូវបានត្រឡប់ទៅផ្ទះវិញជាមួយឪពុកម្តាយរបស់ទ្រង់ ហើយបានចុះចូលចំពោះឪពុកម្តាយ។ (លូកា ២:៥១-៥២)
ហើយវាជាការល្អសម្រាប់ក្មេងៗរបស់យើងក្នុងការដឹងរឿងនេះ ព្រោះក្មេងៗខ្លះមានអាកប្បកិរិយាដូចជាខ្លួនដឹងគ្រប់យ៉ាង ហើយគិតថាពួកគេមិនចាំបាច់ចុះចូលនឹងឪពុកម្តាយរបស់ពួកគេទេ។ ប្រសិនបើមានម្នាក់ដែលអាចដឹងអ្វីៗទាំងអស់ ម្នាក់នោះគឺជាព្រះយេស៊ូវ។ យ៉ាងណាក៏ដោយ ទ្រង់បានចុះចូលនឹងឪពុកម្តាយនៅលើផែនដីរបស់ទ្រង់។ ពិតជាវិសេសវិសាលណាស់។ ពិតជាមានគុណភាពណាស់។ ពិតជាអស្ចារ្យណាស់។
វាជាការប្រសើរណាស់ក្នុងការមិនតបត ទោះបីជាអ្នកមានអំណាចដើម្បីតបតក៏ដោយ។ អ្នកដែលមានភាពស្លូតបូត គឺជាអ្នកដែលមានកម្លាំង ប៉ុន្តែចេះគ្រប់គ្រងកម្លាំងរបស់គេ។ អ្នកដែលមានអំណាចដែលច្រងេងច្រងាង មិនមែនជាអំណាចទេ។ យើងទាំងអស់គ្នាកោតសរសើរមនុស្សម្នាក់ដែលបង្ហាញពីអំណាចពិតប្រាកដ ជាមនុស្សម្នាក់ដែលអាចតបតបាន ប៉ុន្តែបដិសេធមិនតបត។ នេះធ្វើឲ្យអ្នកនឹកឃើញអំពីព្រះយេស៊ូវ មែនទេ?
ចូរទូលសុំប្រាជ្ញា
គ្រាដែលស្ដេចសាឡូមូននៅវ័យក្មេងនៅឡើយ ព្រះយេហូវ៉ាទ្រង់ក៏លេចមក ទ្រង់ឃើញក្នុងសុបិននិមិត្តនៅវេលាយប់នៅឯងគីបៀន ដោយមានបន្ទូលថា «ចូរសូមអ្វីដែលចង់ឲ្យអញប្រទានដល់ឯងចុះ» (១ ពង្សាវតារក្សត្រ ៣:៥) ឥឡូវនេះ ខ្ញុំចង់បង្ហាញអ្នកថា ស្ដេចសាឡូម៉ូនបន្ទាបខ្លួនប៉ុណ្ណា។ ស្ដេចសាឡូម៉ូនបានទូលព្រះថា ៖
…ទូលបង្គំដូចជាក្មេងតូច ឥតដឹងជាត្រូវចេញចូលយ៉ាងណាឡើយ ទូលបង្គំ ជាបាវបំរើទ្រង់ នៅកណ្តាលប្រជាជន ដែលទ្រង់បានជ្រើសរើស ជាសាសន៍១ធំ មានគ្នាច្រើនហួសកំណត់នឹងរាប់បាន ដូច្នេះ សូមទ្រង់ប្រទានឲ្យទូលបង្គំ ជាបាវបំរើទ្រង់ មានចិត្តប្រកបដោយប្រាជ្ញា ដើម្បីនឹងគ្រប់គ្រងលើរាស្ត្រទ្រង់ ប្រយោជន៍ឲ្យទូលបង្គំបានពិចារណាដឹងខុសត្រូវ ដ្បិតតើមានអ្នកណាអាចនឹងគ្រប់គ្រងលើរាស្ត្រទ្រង់ ដែលមានគ្នាច្រើនទាំងនេះបាន។
– ១ ពង្សាវតារក្សត្រ ៣:៧–៩
ស្ដេចសាឡូម៉ូនបានមានបន្ទូលថា ទ្រង់ប្រៀបដូចជាក្មេងតូចម្នាក់ដែលមិនដឹងថាត្រូវចេញឬចូលយ៉ាងណាឡើយ កុំថាឡើយគ្រប់គ្រងរាស្ត្ររបស់ព្រះនោះ។ ទ្រង់បានបន្ទាបខ្លួនគ្រប់គ្រាន់ដើម្បីឃើញថាទ្រង់ត្រូវការព្រះប្រាជ្ញាញាណរបស់ព្រះ ហើយទូលសុំពីព្រះ។
ដូចជាស្តេចសាឡូម៉ូន យើងក៏ត្រូវបន្ទាបខ្លួនដែរ។ យើងត្រូវមើលឃើញថាយើងត្រូវការប្រាជ្ញារបស់ព្រះ ហើយទូលសុំទ្រង់ប្រទានប្រាជ្ញាដល់យើង។ ព្រះគម្ពីរចែងថា ៖
តែបើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ ដែលទ្រង់ប្រទានដល់មនុស្សទាំងអស់ដោយសទ្ធា ឥតបន្ទោសផង នោះទ្រង់នឹងប្រទានឲ្យ
– យ៉ាកុប ១:៥
“«បើអ្នករាល់គ្នាណាមួយខ្វះប្រាជ្ញា…»” ខ្ញុំតែងតែឃើញខ្លួនឯងនៅត្រង់នេះ។ នោះហើយជាមូលហេតុដែលការអធិស្ឋានរបស់ខ្ញុំគឺតែងតែនិយាយថា «ឱព្រះអើយ សូមប្រទានវិញ្ញាណនៃប្រាជ្ញា និងការបើកសម្ដែងដល់ទូលបង្គំ ក្នុងការស្គាល់ព្រះគ្រីស្ទ ដើម្បីបម្រើទ្រង់បានប្រសើរជាងមុន។
បងប្អូនអើយ យើងត្រូវការប្រាជ្ញាដើម្បីយកឈ្នះលើបញ្ហាប្រឈមដែលយើងជួបប្រទះក្នុងជីវិត។ ប៉ុន្តែ ប្រាជ្ញានឹងមិនកើតមានទេ លុះត្រាតែអ្នកឃើញថាអ្នកត្រូវការប្រាជ្ញា។
ការធ្វើអាជីវកម្មជាមួយអ្នកជឿ
ឥឡូវនេះ ចំណុចមួយដែលខ្ញុំចង់បញ្ជាក់គឺ ៖ ការធ្វើអាជីវកម្មជាមួយអ្នកជឿ។ ត្រូវប្រុងប្រយ័ត្នខ្ពស់ នៅពេលអ្នកធ្វើអាជីវកម្មក្នុងក្រុមជំនុំជាមួយអ្នកជឿ។ សូមកុំមានគំនិតល្ងង់ខ្លៅនេះថា ដោយសារតែបុគ្គលនោះជាគ្រីស្ទបរិស័ទ អ្នកអាចទុកចិត្តគាត់បាន ហើយមិនចាំបាច់បែងចែកខ្មៅ និងសជាមួយគាត់នោះទេ។
ខ្ញុំមិនអាចប្រាប់អ្នកបានទេថា មានប៉ុន្មានដងដែលខ្ញុំបានឃើញទំនាក់ទំនងល្អប្រែជាជូរចត់ដោយសារតែរឿងនេះ។ «ខ្ញុំនឹងធ្វើរឿងនេះដោយស្ម័គ្រចិត្តដូចជាការបម្រើដល់ក្រុមជំនុំ»។ «មិនអីទេ ខ្ញុំទុកចិត្តគាត់។ គាត់ក៏ជាគ្រីស្ទបរិស័ទដែរ»។ ក្រោយមក មានការឈ្លោះប្រកែកគ្នា។ មានភាពជូរចត់។ មានកំហឹង។ ហេតុអ្វី? ដោយសារតែអ្វីៗមិនបានធ្វើឡើងដោយមានវិជ្ជាជីវៈត្រឹមត្រូវ។ កិច្ចព្រមព្រៀងមិនបានកំណត់ខ្មៅ និងសទេ។
មានគូស្វាមីភរិយាពីរគូនៅក្នុងក្រុមជំនុំរបស់យើង ដែលជាមិត្តល្អនឹងគ្នា។ គូស្វាមីភរិយាទាំងពីរគូបានរៀបការនៅពេលដំណាលគ្នា។ ផ្ទះរបស់គូស្វាមីភរិយាមួយគូមិនទាន់រួចរាល់នៅឡើយទេ ដូច្នេះគូស្វាមីភរិយាមួយគូទៀតបានអញ្ជើញពួកគេឲ្យស្នាក់នៅក្នុងផ្ទះរបស់ពួកគេ។ រឿងបន្ទាប់ដែលអ្នកដឹងគឺ ម្ចាស់ផ្ទះបានចាប់ផ្តើមត្អូញត្អែរអំពីសម្លៀកបំពាក់សើមរបស់គូស្វាមីភរិយាមួយគូទៀត ដែលមិនបានហាលឲ្យបានត្រឹមត្រូវ ហើយមានទឹកស្រក់មកលើឥដ្ឋ។ មិនចាំបាច់និយាយទេ ទំនាក់ទំនងរបស់ពួកគេត្រូវបានប៉ះពាល់។
ឥឡូវនេះ ខ្ញុំមិននិយាយថា អ្នកមិនអាចធ្វើជំនួញជាមួយគ្រីស្ទបរិស័ទទេ។ ប្រសិនបើអ្នកធ្វើ ត្រូវប្រាកដថាអ្នកសរសេរអ្វីៗឲ្យច្បាស់លាស់ បែងចែកខ្មៅ និងស។ កុំគ្រាន់តែធ្វើដោយផ្អែកលើកិច្ចព្រមព្រៀងផ្ទាល់មាត់ឡើយ។
ចូរមានប្រាជ្ញាដូចសត្វពស់
យ៉ាងណាក៏ដោយ គ្រិស្តបរិស័ទអាចងាយនឹងជឿទុកចិត្ត។ នោះហើយជាមូលហេតុដែលជនឆបោកចូលចិត្តមកក្រុមជំនុំ។ ដូច្នេះខ្ញុំចង់និយាយរឿងដូចគ្នាទៅកាន់បងប្អូនទាំងអស់គ្នាដែរថា ព្រះអម្ចាស់របស់យើងទ្រង់មានបន្ទូល ៖
ខ្ញុំចាត់អ្នករាល់គ្នាឲ្យទៅ ដូចជាចៀមនៅកណ្តាលហ្វូងស្វាន ដូច្នេះ ចូរធ្វើជាអ្នកឆ្លាតដូចជាពស់ ហើយសុភាពដូចព្រាប។
– ម៉ាថាយ ១០:១៦
ធ្វើជាអ្នកឆ្លាតដូចជាពស់ ហើយសុភាពដូចព្រាប។ ខ្ញុំមិនចាំបាច់ប្រកាសនៅផ្នែកចុងក្រោយទេ។ បងប្អូនសុភាពដូចព្រាប លើកលែងតែចំពោះមនុស្សមួយចំនួនដែលចូលចិត្តនិយាយដើមគេ និងវាយប្រហាគេពីក្រោយខ្នង!
តែងតែមានមនុស្សនៅក្នុងក្រុមជំនុំដែលគួរឲ្យទុកចិត្តខ្លាំង ប៉ុន្តែមិនមានការប្រុងប្រយ័ត្នទេ។ មានបុរសម្នាក់ដើរមក ហើយនិយាយទៅកាន់ក្មេងស្រីម្នាក់ថា «ព្រះអម្ចាស់មានបន្ទូលដូច្នេះថា “កូនអើយ ឯងមានសម្រស់បែបនេះនៅក្នុងខ្លួន”។ ហើយគ្មាននរណាមើលឃើញទេ។ ប៉ុន្តែព្រះអម្ចាស់ទតឃើញ ហើយខ្ញុំក៏ឃើញដែរ»។ បុរសនោះកំពុងព្យាយាមល្បួងក្មេងស្រីនោះ។ ហើយក្មេងស្រីនោះនិយាយថា «អ្នកជាមនុស្សដែលព្រះបញ្ជូនមកមែន!» នេះមិនមែនជាចម្លើយឈ្លាសវៃទេ!
ស្ត្រីមួយចំនួនថែមទាំងបានចេញទៅផឹកកាហ្វេជាមួយបុរសដែលរៀបការហើយទៀតផង។ នៅពេលដែលខ្ញុំសួរពួកនាងថាហេតុអ្វីបានជាពួកនាងធ្វើដូច្នេះ ពួកនាងបាននិយាយថា «ប៉ុន្តែលោកគ្រូ ព្រីនស៍ គាត់រៀបការរួចហើយ»។ ដូច្នេះខ្ញុំប្រាប់ពួកនាងថា «អ្នកមិនគួរធ្វើវាទៀតទេ!»
យ៉ាងណាមិញ អ្នកដឹកនាំក្រុមកោសិកាក្នុងក្រុមជំនុំរបស់យើងត្រូវបានហាមមិនឲ្យជូនក្មេងស្រីណាម្នាក់ទៅផ្ទះដោយឡានរបស់ពួកគេទេ។ ពួកគេមិនអាចទូរស័ព្ទទៅក្មេងស្រីទាំងនោះហើយនិយាយថា «ខ្ញុំមិនបានឃើញអ្នកមកក្រុមកោសិកាកាលពីសប្តាហ៍មុន។ តើអ្នកទៅណា?» ប្រសិនបើខ្ញុំដឹងពីអ្នកដឹកនាំរបស់ខ្ញុំណាម្នាក់ដែលមានអាកប្បកិរិយាបែបនេះ ខ្ញុំនឹងដោះស្រាយជាមួយអ្នកដឹកនាំនោះ!
ចូរមានប្រាជ្ញាដូចសត្វពស់។ កុំឲ្យនរណាម្នាក់គិតថា អ្នកជាមនុស្សល្ងង់ដោយសារតែអ្នកជាអ្នកជឿនោះឡើយ។
ប្រាជ្ញាក្នុងដំណាក់កាលស្វែងយល់ចិត្តគ្នា
នារីៗទាំងឡាយ ចូររៀននិយាយពាក្យថា «ទេ» នៅក្នុងដំណាក់កាលស្វែងយល់ចិត្តគ្នា ហើយបុរសម្នាក់នោះនឹងគោរពអ្នក ព្រមទាំងតាមស្រឡាញ់ (យកចិត្ត) អ្នកមិនខាន។ ការនិយាយថា «យល់ព្រម/ចាស៎» គ្រប់ពេល ថ្ងៃណាមួយគាត់នឹងចាកចេញពីអ្នក។ បន្ទាប់ពីគាត់ទទួលបានអ្វីដែលគាត់ចង់បាន គាត់នឹងចាកចេញពីអ្នក។
សូមគិតមុនពេលអ្នកនិយាយថា «យល់ព្រម/ចាស៎» គ្រប់ពេល។ ចូររៀនឲ្យមានប្រាជ្ញាដូចសត្វពស់។
ហើយប្រសិនបើអ្នកតែងតែចំណាយសម្រាប់បុរសនោះ ឬប្រសិនបើគាត់តែងតែខ្ចីលុយពីអ្នក អ្នកគួរតែប្រុងប្រយ័ត្នខ្ពស់។ បុរសម្នាក់ដែលមិនចង់ធ្វើការ ហើយតែងតែនិយាយផ្អែមល្ហែមជាមួយអ្នក ដើម្បីឲ្យគាត់ខ្ចីលុយ មិនមែនជាបេក្ខជនល្អសម្រាប់ដៃគូជីវិតនោះទេ។ សូមប្រាប់គាត់ឲ្យរកការងារធ្វើ!
ប្រាជ្ញាគឺជាព្រះវិញ្ញាណ
បន្ទាប់ពីព្រះយេស៊ូវប្រាប់យើងឲ្យឈ្លាសវៃដូចពស់ ហើយសុភាពដូចសត្វព្រាប ខគម្ពីរពីរខាងក្រោមនេះទ្រង់មានបន្ទូលថា ៖
អ្នករាល់គ្នានឹងត្រូវគេបញ្ជូនទៅនៅមុខចៅហ្វាយខេត្ត ហើយនៅចំពោះស្តេច ដោយព្រោះខ្ញុំ ទុកជាទីបន្ទាល់ដល់លោកទាំងនោះ ហើយនឹងពួកសាសន៍ដទៃដែរ ប៉ុន្តែ កាលណាគេចាប់បញ្ជូនអ្នករាល់គ្នាទៅ នោះកុំឲ្យថប់ព្រួយពីបែបនិយាយ ឬពីពាក្យដែលត្រូវថាឡើយ ពីព្រោះសេចក្ដីដែលត្រូវនិយាយ នឹងបានប្រទានមកអ្នករាល់គ្នានៅវេលានោះឯង ដ្បិតមិនមែនជាអ្នករាល់គ្នាដែលត្រូវនិយាយទេ គឺជាព្រះវិញ្ញាណរបស់ព្រះវរបិតានៃអ្នកទេតើ ដែលទ្រង់មានបន្ទូលក្នុងខ្លួនអ្នកវិញ
– ម៉ាថាយ ១០:១៨–២០
នៅត្រង់នេះ ព្រះយេស៊ូវមានបន្ទូលថា នៅពេលដែលអ្នកត្រូវបានគេនាំទៅឈរនៅចំពោះមុខមនុស្សជាន់ខ្ពស់ អភិបាល និងស្តេច ព្រោះតែការបម្រើព្រះ សូមកុំបារម្ភអំពីរបៀប ឬអ្វីដែលអ្នកគួរនិយាយឡើយ ព្រោះព្រះនឹងប្រទានពាក្យដល់អ្នកដើម្បីនិយាយ «ដ្បិតមិនមែនជាអ្នកទេដែលនិយាយ គឺព្រះវិញ្ញាណរបស់ព្រះវរបិតារបស់អ្នកដែលនិយាយនៅក្នុងអ្នក»។ សូមកត់សម្គាល់ថា ទ្រង់មានបន្ទូលថាគឺជា «ព្រះវិញ្ញាណរបស់ព្រះវរបិតារបស់អ្នក» ដែលនិយាយនៅក្នុងអ្នក។ ម្យ៉ាងវិញទៀត ប្រាជ្ញាគឺជាព្រះវិញ្ញាណ។
ព្រះបានប្រាប់លោកម៉ូសេថា «មើល អញបានហៅបេតសាលាល ជាកូនយូរី ដែលជាកូនហ៊ើរ ក្នុងពូជអំបូរយូដា ហើយអញបានបំពេញគាត់ដោយព្រះវិញ្ញាណនៃព្រះ ឲ្យមានគំនិតវាងវៃ មានយោបល់មានចំណេះចេះធ្វើការគ្រប់មុខទាំងអស់។» (និក្ខមនំ ៣១:២-៣)
លោកប៉ុលបានអធិស្ឋានសម្រាប់ក្រុមជំនុំនៅក្រុងអេភេសូរ ដើម្បីឲ្យព្រះប្រទានឲ្យពួកគេមាន «ព្រះវិញ្ញាណ ដែលប្រោសឲ្យមានប្រាជ្ញា ហើយក៏បើកសំដែង ឲ្យដឹងពីដំណើរស្គាល់ទ្រង់»។ (អេភេសូរ ១:១៧) ហើយលោកយ៉ូស្វេ «ពេញដោយប្រាជ្ញា ពីព្រោះម៉ូសេបានដាក់ដៃលើលោក។» ” (ចោទិយកថា ៣៤:៩)
នៅពេលដែលអ្នករៀនបានថា ប្រាជ្ញាគឺជាវិញ្ញាណ ចូរសុំឲ្យព្រះប្រទានប្រាជ្ញាដល់អ្នកជារៀងរាល់ថ្ងៃ បន្ទាប់មករៀនធ្វើតាមការដឹកនាំរបស់ព្រះវិញ្ញាណ។ ចូររៀនដើរដោយព្រះវិញ្ញាណ។
រឿងមួយអំពីវិញ្ញាណគឺថា វិញ្ញាណអាចចម្លងបាន។ ប្រសិនបើអ្នកនៅជុំវិញមនុស្សដែលមានជំងឺធ្លាក់ទឹកចិត្ត អ្នកអាចមានអារម្មណ៍ថាធ្លាក់ទឹកចិត្តដែរ។ ក៏ដូចគ្នាដែរ ប្រសិនបើអ្នកស្ថិតនៅក្នុងបរិយាកាសដែលមនុស្សជាច្រើនកំពុងជក់បារី ទោះបីជាអ្នកមិនជក់បារីក៏ដោយ អ្នកនឹងដើរចេញពីពួកគេដោយមានក្លិនផ្សែងបារីជាប់ខ្លួន។
ក្នុងរបៀបដូចគ្នា ប្រាជ្ញាអាចចូលមករកអ្នកដោយការចំណាយពេល ៖
«អ្នកណាដែលដើរជាមួយនឹងមនុស្សប្រាជ្ញ នោះនឹងមានប្រាជ្ញាដែរ តែអ្នកណាដែលភប់ប្រសព្វនឹងមនុស្សល្ងីល្ងើ នោះនឹងត្រូវខូចបង់វិញ។»។ (សុភាសិត ១៣:២០)
ថ្វីមាត់ និងប្រាជ្ញាសម្រាប់ពេលណាមួយ
ព្រះយេស៊ូវមានបន្ទូលថា «គឺជាព្រះវិញ្ញាណរបស់ព្រះវរបិតានៃអ្នក» ទេតើ ដែលទ្រង់មានបន្ទូលក្នុងខ្លួនអ្នកវិញ» នឹងប្រទានពាក្យពេចន៍ដល់អ្នក នៅពេលដែលអ្នករាល់គ្នាត្រូវបាននាំមកឈរនៅចំពោះមុខអភិបាល និងស្តេច ព្រោះតែការបម្រើដល់ព្រះ។ (ម៉ាថាយ ១០:១៨-២០) ដូច្នេះ អ្នកមិនចាំបាច់ព្រួយបារម្ភអំពីអ្វីដែលត្រូវនិយាយនោះទេ។
នៅក្នុងដំណឹងល្អរបស់លោកលូកា ព្រះយេស៊ូវមានបន្ទូលដូចគ្នាថា ៖
ដូច្នេះ ចូរសំរេចក្នុងចិត្តថា អ្នករាល់គ្នានឹងមិនគិតជាមុន អំពីពាក្យដែលត្រូវដោះសាទេ ដ្បិតខ្ញុំនឹងឲ្យអ្នករាល់គ្នាមានថ្វីមាត់ ហើយនឹងប្រាជ្ញាវិញ ដែលពួកអ្នកតតាំងពុំអាចនឹងឆ្លើយឆ្លង ឬទទឹងទាស់បានឡើយ។
– លូកា ២១:១៤-១៥
ទ្រង់មានបន្ទូលប្រាប់យើងថា យើងមិនចាំបាច់គិតជាមុនអំពីរបៀបឆ្លើយតបទៅអ្នកតតាំងនឹងយើងទេ ព្រោះទ្រង់នឹងប្រទានឲ្យយើងនូវ «ថ្វីមាត់ និងប្រាជ្ញា» ដែលពួកអ្នកតតាំងពុំអាចនឹងឆ្លើយឆ្លង ឬទទឹងទាស់បានឡើយ! នេះរំឭកខ្ញុំអំពីលោកស្ទេផាននៅក្នុងកណ្ឌគម្ពីរកិច្ចការ។ ពួកផារីស៊ី «ពុំអាចដើម្បីទប់ទល់នឹងប្រាជ្ញា ហើយនឹងព្រះវិញ្ញាណ ដែលគាត់អាងនឹងនិយាយនោះបានទេ»។ ” (កិច្ចការ ៦:១០) នេះជាអ្វីដែលខ្ញុំអធិស្ឋានសុំរាល់ពេលដែលខ្ញុំអធិប្បាយព្រះបន្ទូល។ ខ្ញុំអធិស្ឋានសូមឲ្យព្រះប្រទានឲ្យខ្ញុំមានថ្វីមាត់ និងប្រាជ្ញា ដែលគ្មានពួកអ្នកតតាំងអាចជំទាស់ ឬទប់ទល់បានឡើយ។
ខ្ញុំចាំបានច្រើនឆ្នាំមុន នៅពេលដែលក្រុមជំនុំរបស់យើងមានទំហំតូចនៅឡើយ ខ្ញុំគ្រាន់តែជាអ្នកចាស់ទុំម្នាក់នៅក្នុងក្រុមជំនុំ។ មានក្មេងស្រីម្នាក់ដែលបានទទួលជឿ។ មិត្តប្រុសរបស់នាងនៅពេលនោះគឺជាក្មេងទំនើង។ បន្ទាប់ពីនាងបានទទួលជឿ នាងមិនចង់ធ្វើរឿងមួយចំនួនដែលពួកគេធ្លាប់ធ្វើជាមួយគ្នាពីមុននោះទេ។ នាងបានផ្លាស់ប្តូរយ៉ាងខ្លាំង។
ដូច្នេះមិត្តប្រុសរបស់នាងខឹងយ៉ាងខ្លាំង ហើយនិយាយថា គាត់នឹងមករករឿងយើងដល់ក្នុងក្រុមជំនុំ។ ក្នុងអំឡុងពេលនៃការប្រជុំថ្វាយបង្គំ ខ្ញុំបានដើរប៉ះគាត់។ ខ្ញុំកំពុងចុះកាំជណ្តើរ ហើយគាត់កំពុងឡើងមក។ មើលទៅគាត់ហាក់ដូចជាកំពុងដើរទៅវាយនរណាម្នាក់។
មានកន្លែងច្រើនណាស់ ខ្ញុំបែរជាត្រូវជួបគាត់នៅកាំជណ្តើរ។ គ្មាននរណាម្នាក់នៅទីនោះដើម្បីជួយខ្ញុំទេ ប្រសិនបើគាត់វាយខ្ញុំ!
ខ្ញុំនៅចាំបានថា ពេលខ្ញុំឃើញគាត់ ខ្ញុំបាននិយាយថា «អូ សួស្តី»។
«កុំសួស្តីខ្ញុំ! ខ្ញុំមកដើម្បីវាយនរណាម្នាក់!» គាត់បានឆ្លើយបែបនេះ។ «គឺអ្នកមនុស្សក្នុងវិហារ ប្រាប់មិត្តស្រីរបស់ខ្ញុំឲ្យ…» ខ្ញុំអាចមើលឃើញកណ្តាប់ដៃរបស់គាត់។ គាត់ខឹងខ្លាំងណាស់។ គាត់ក៏ស្រវឹងស្រាស្រឿងៗដែរ។
ដោយមិនដឹងថាត្រូវធ្វើអ្វី ហើយខ្លាចថាគាត់នឹងវាយខ្ញុំ ខ្ញុំបាននិយាយតិចៗថា «ព្រះអម្ចាស់អើយ សូមជួយផង!»
ហើយខ្ញុំសុំប្រាប់អ្នកថា ព្រះស្មោះត្រង់ណាស់។ នៅពេលនោះ ដូចជាមានទន្លេហូរចេញពីខ្ញុំ ខ្ញុំបានសម្លឹងមើលគាត់ ហើយនិយាយថា «តើមាននរណាធ្លាប់ប្រាប់អ្នកថា អ្នកមើលទៅដូចជាតារាភាពយន្តឥណ្ឌាទេ…?»
អ្នកឃើញទេ គាត់ជាជនជាតិឥណ្ឌា ហើយគាត់រំឭកខ្ញុំអំពីតារាភាពយន្តឥណ្ឌាដ៏ល្បីល្បាញម្នាក់។ កាលខ្ញុំនៅក្មេង ខ្ញុំបានមើលភាពយន្តឥណ្ឌាជាច្រើន ព្រោះម្តាយរបស់ខ្ញុំចូលចិត្តភាពយន្តឥណ្ឌា។ ម្ដាយខ្ញុំដូចជាប្រាថ្នាឲ្យខ្ញុំក្លាយជាតារាឥណ្ឌា ប៉ុន្តែវាមិនខុសគ្នាប៉ុន្មានទេក្នុងការធ្វើជាអ្នកអធិប្បាយ ព្រោះអ្នកក៏ត្រូវឡើងលើឆាកដែរ។ ខ្ញុំនិយាយលេងទេ! មែនហើយ!
និយាយដោយស្មោះត្រង់ទៅ គាត់ពិតជាមើលទៅដូចតារាឥណ្ឌាមែន។ ដូច្នេះខ្ញុំមិនបានកុហកគាត់ទេ ពេលខ្ញុំនិយាយបែបនោះ។
គាត់មើលមកខ្ញុំហើយនិយាយថា «អ្នកពិតជាគិតដូច្នេះមែនទេ? មិត្តភក្តិរបស់ខ្ញុំជាច្រើនក៏ប្រាប់ខ្ញុំបែបនោះដែរ»។ គាត់ចាប់ផ្តើមបន្ធូរអារម្មណ៍ ហើយលាកណ្តាប់ដៃវិញ។
ខ្ញុំបាននិយាយថា «មែនហើយ អ្នកដូចណាស់។ តើអ្នកបានមើលភាពយន្តរបស់គាត់មួយណា?»
គាត់និយាយថា «ខ្ញុំបានមើលភាពយន្តរបស់គាត់ទាំងអស់ ព្រោះមិត្តភក្តិរបស់ខ្ញុំតែងតែប្រាប់ខ្ញុំថា ខ្ញុំមើលទៅដូចគាត់»។
បន្ទាប់មក គាត់បានប្រាប់ខ្ញុំថា គាត់មិនមែននៅទីនោះដើម្បីបង្កបញ្ហានោះទេ ប៉ុន្តែដើម្បីមើលអ្វីដែលបានកើតឡើងនៅក្នុងក្រុមជំនុំរបស់យើង ព្រោះមិត្តស្រីរបស់គាត់មានអាកប្បកិរិយាខុសប្លែកខ្លាំង។ ដូចដែលខ្ញុំបាននិយាយពីមុន នាងបានផ្លាស់ប្តូរយ៉ាងខ្លាំង។ មួយរយៈក្រោយមក គាត់ថែមទាំងបានទទួលជឿព្រះគ្រីស្ទ ហើយមកចូលរួមក្រុមជំនុំជាញឹកញាប់ទៀតផង។
បងប្អូនអើយ! វាពិតជាមានប្រយោជន៍ណាស់ នៅពេលដែលព្រះប្រទានឲ្យអ្នកមាន «ថ្វីមាត់ និងប្រាជ្ញា ដែលគ្មានពួកអ្នកតតាំងអាចជំទាស់ ឬទប់ទល់បានឡើយ។» (លូកា ២១:១៥)
ព្រះយេស៊ូវជាប្រាជ្ញារបស់អ្នក
មានពេលមួយ ពួកផារីស៊ីបានសួរព្រះយេស៊ូវថា «តើបើកឲ្យយើងខ្ញុំបង់ពន្ធថ្វាយសេសារឬទេ?» ចេតនារបស់ពួកគេគឺដើម្បីចាប់កំហុសព្រះបន្ទូលរបស់ព្រះយេស៊ូវ ហើយនេះគឺជាការសង្ខេបរបស់ខ្ញុំអំពីអ្វីដែលបានកើតឡើង។
ប្រសិនបើព្រះយេស៊ូវមានបន្ទូលថា «ទេ អ្នកមិនគួរទេ» ពួកគេនឹងចោទប្រកាន់ទ្រង់នៅចំពោះមុខលោកប៉ុនទាសពីឡាត់ថាបានបំពានច្បាប់រ៉ូម៉ាំង។ ប្រសិនបើទ្រង់មានបន្ទូលថា «មែនហើយ អ្នកគួរតែបង់ពន្ធដល់សេសារ» ពួកគេនឹងនិយាយទៅកាន់ទ្រង់ថា «មើល៍ អ្នកជាគ្នារបស់ពួករ៉ូមុាំង»។
ប៉ុន្តែ ព្រះយេស៊ូវជ្រាបពីអ្វីដែលពួកគេកំពុងធ្វើ ទ្រង់មានបន្ទូលទៅពួកគេថា «ចូរឲ្យកាក់មួយមកខ្ញុំ។ តើនេះជារូបនរណា?»
ពួកគេទាំងអស់គ្នាឆ្លើយថា «រូបរបស់សេសារ»។
«បើដូច្នេះ ចូរថ្វាយរបស់សេសារទៅសេសារទៅ ហើយរបស់ព្រះទៅព្រះវិញ»។
ពួកផារីស៊ីមានការភ្ញាក់ផ្អើលចំពោះចម្លើយរបស់ទ្រង់ ហើយនៅស្ងៀម។ ខណនោះ គេចាប់ព្រះបន្ទូលទ្រង់នៅមុខជនទាំងឡាយមិនបាន ហើយក៏ស្ងៀមនៅ ដោយអស្ចារ្យពីចំឡើយរបស់ទ្រង់! (លូកា ២០:២១-២៦)
បងប្អូនអើយ ព្រះនឹងប្រទានប្រាជ្ញាដល់អ្នករាល់គ្នាសម្រាប់គ្រប់ស្ថានភាពទាំងអស់ដែលអ្នកជួបប្រទះ។ មិនថាជាអ្វីដែលត្រូវនិយាយ ឬអ្វីដែលត្រូវធ្វើទេ ទ្រង់នឹងប្រទានប្រាជ្ញាដល់អ្នកដើម្បីដោះស្រាយស្ថានភាពនោះ។
ដូច្នេះ ចូរទូលសូមព្រះសម្រាប់វិញ្ញាណនៃប្រាជ្ញាឲ្យធ្វើការក្នុងអ្នក។ ចូរចាំថា មានម្នាក់ដែលមានប្រាជ្ញាខ្ពស់ជាងស្ដេចសាឡូម៉ូន គឺព្រះយេស៊ូវ ដែលគង់នៅក្នុងអ្នក។ ទ្រង់គឺជាព្រះប្រាជ្ញាញាណរបស់ព្រះ។ ទ្រង់គង់នៅខាងស្ដាំព្រះហស្តរបស់ព្រះវរបិតា ហើយទ្រង់ត្រៀមខ្លួនជាស្រេចដើម្បីក្លាយជាប្រាជ្ញារបស់អ្នកនៅក្នុងគ្រប់វិបត្តិនៃជីវិតរបស់អ្នក ក្នុងគ្រប់ស្ថានភាពដែលអ្នកជួបប្រទះ
ធនធានបន្ថែមទៀតដែលដូចធនធាននេះ
ចូរប្រយ័ត្នចំពោះគ្រោះថ្នាក់នៃព្រះគុណក្លែងក្លាយ
យើងរស់នៅក្នុងសម័យកាលដ៏គួរឲ្យរំភើប។ ព្រះអម្ចាស់ព្រះយេស៊ូវគ្រីស្ទរបស់យើងពិតជាកំពុងស្ដារឡើងវិញនូវដំណឹងល...
សម្រាប់អ្នកដែលចង់ដើរកាន់តែជិតស្និទ្ធជាមួយព្រះយេស៊ូវ អត្ថបទនេះគឺសម្រាប់អ្នក
តើអ្នកធ្លាប់ឆ្ងល់ទេថា តើអ្នកអាចចូលរួមជាមួយព្រះយេស៊ូវកាន់តែច្រើននៅក្នុងជីវិតប្រចាំថ្ងៃរបស់អ្នក ប៉ុន្ត...
សេចក្ដីសុចរិតជាអំណោយ
អ្នកមិនអាចទទួលបានព្រះពរពីព្រះតាមរយៈការប្រព្រឹត្តល្អរបស់អ្នកឡើយ។ ព្រះពរទាំងអស់របស់ទ្រង់ រួមទាំងព្រះព...
ការយល់ដឹងអំពីសារៈសំខាន់នៃដើមអូលីវ និងប្រេងតាំង
នៅក្នុងព្រះគម្ពីរសញ្ញាចាស់ ព្រះបានជ្រើសយកប្រេងតាំងដើម្បីប្រទានព្រះពរដល់រាស្ត្ររបស់ទ្រង់។ ប៉ុន្តែ តើ...
សូមដើរដោយមានការការពាររបស់ព្រះនៅថ្ងៃនេះ
ព្រះបន្ទូលរបស់ព្រះពោរពេញដោយការសន្យាអំពីការការពាររប ស់ព្រអង្គ សម្រាប់កូនៗជាទីស្រឡាញ់របស់ទ្រង់។ ជាឧទាហ...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ៣/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ២/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ១/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
ការមើលឃើញព្រះយេស៊ូវនៅក្នុងព្រះបន្ទូលផ្ដល់នូវជីវិត (ភាគទី ២/៣)
សូមឲ្យអ្នកមើលឃើញព្រះយេស៊ូវនៅក្នុងព្រះបន្ទូល ហើយទទួលយកបទពិសោធនៃជីវិតដែលរស់ឡើងវិញរបស់ព្រះ នៅក្នុងផ្...
ការមើលឃើញព្រះយេស៊ូវនៅក្នុងព្រះបន្ទូល ផ្ដល់នូវជីវិត (ភាគទី ១/៣)
សូមឲ្យអ្នកមើលឃើញព្រះយេស៊ូវនៅក្នុងព្រះបន្ទូល ហើយទទួលយកបទពិសោធនៃជីវិតដែលរស់ឡើងវិញរបស់ព្រះ នៅក្នុងផ្...
សេចក្តីសង្ឃឹមដែលមិនធ្វើឲ្យខកចិត្ត (ភាគទី ៣/៣)
ចូរលះបង់គំនិតអវិជ្ជមាន ហើយចាប់ផ្តើមបង្កើតការរំពឹងទុកដោយទំនុកចិត្តចំពោះសេចក្តីល្អរបស់ព្រះសម្រាប់អ្នកជ...
សេចក្តីសង្ឃឹមដែលមិនធ្វើឲ្យខកចិត្ត (ភាគទី ២/៣)
ចូរលះបង់គំនិតអវិជ្ជមាន ហើយចាប់ផ្តើមបង្កើតការរំពឹងទុកដោយទំនុកចិត្តចំពោះសេចក្តីល្អរបស់ព្រះសម្រាប់អ្នកជ...
សេចក្តីសង្ឃឹមដែលមិនធ្វើឲ្យខកចិត្ត (ភាគទី ១/៣)
ចូរលះបង់គំនិតអវិជ្ជមាន ហើយចាប់ផ្តើមបង្កើតការរំពឹងទុកដោយទំនុកចិត្តចំពោះសេចក្តីល្អរបស់ព្រះសម្រាប់អ្នកជ...
ជាវជាប្រចាំ