ការយកឈ្នះលើសមរភូមិនៃចិត្តគំនិតរបស់អ្នក (ភាគទី ១/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោរពេញដោយអំណរ សេចក្តីសុខសាន្ត និងភាពពេញលេញផ្លូវចិត្ត។ សូមចូលរួមជាមួយលោកគ្រូ យ៉ូសែប ព្រីនស៍ នៅក្នុងស៊េរីដែលមានបីភាគនេះ ហើយស្វែងយល់ពីរបៀបដែលអ្នកអាចយកឈ្នះលើចំណងផ្លូវចិត្តទាំងអស់ ដោយសម្រាកក្នុងការស្ដាប់បង្គាប់របស់ព្រះគ្រីស្ទ និងកិច្ចការដែលទ្រង់បានបញ្ចប់នៅលើឈើឆ្កាង។
ចិត្តគំនិតដ៏ស្ងប់សុខគឺជាបំណងព្រះហឫទ័យរបស់ព្រះសម្រាប់អ្នក
មេនឌី (Mandy) ឈរសម្លឹងមើលខ្លួនឯងនៅក្នុងកញ្ចក់ ពេលគាត់នៅក្នុងបន្ទប់តែម្នាក់ឯង។ បន្ទប់នោះ ងងឹតសឹងតែសូន្យសុង មានតែពន្លឺពីអេក្រង់កុំព្យូទ័រប៉ុណ្ណោះ។ នាងប្រើប្រាស់ប្រព័ន្ធអ៊ីនធឺណិត ប៉ុន្តែវាមិនបានផ្តល់អារម្មណ៍រត់គេចពីតថភាព ដែលនាងបានស្វែងរកនោះទេ។ សូរសំឡេងតន្ត្រីកំពុងបន្លឺឡើងឡើងយ៉ាងខ្ទរ។ នាងបើកសំឡេងឮៗនេះ ដើម្បីបន្លប់នូវគំនិត និងសំឡេងដែលកំពុងបន្លឺឡើងនៅក្នុងខួរក្បាលរបស់នាង។ គំនិតទាំងនោះបន្លឺឡើងជាថ្មីម្តងទៀត ហើយឆ្លងកាត់គំនិតរបស់នាងយ៉ាងរហ័យម្តងមួយៗដោយមិនសម្រាក ៖
ខ្ញុំមិនស្អាត។ ខ្ញុំបរាជ័យខ្លាំងណាស់។ គ្មាននរណាម្នាក់ស្រឡាញ់ខ្ញុំទេ។ គ្មានរឿងណាមួយរលូនសម្រាប់ខ្ញុំទេ។ ហេតុអ្វីបានជាខ្ញុំនៅរស់ទៀត? ខ្ញុំមិនសមនឹងរស់នៅទេ។ ខ្ញុំស្អប់ជីវិតរបស់ខ្ញុំ។ ខ្ញុំគ្រាន់តែចង់ស្លាប់ប៉ុណ្ណោះ!
ដោយនាងបានជឿថានាងជាមនុស្សមិនស្អាត បរាជ័យ និងគ្មានប្រយោជន៍ ក្មេងជំទង់រូបនេះបានចាប់ផ្តើមដកខ្លួនចេញពីមិត្តភក្តិ និងក្រុមគ្រួសារ។ មិនយូរប៉ុន្មាន នាងបានធ្លាក់ចូលទៅក្នុងរណ្តៅដ៏ជ្រៅ និងងងឹតនៃការធ្លាក់ទឹកចិត្ត ដែលហ៊ុំព័ទ្ធនាងកាន់តែខ្លាំងឡើងៗជារៀងរាល់ថ្ងៃ។ នាងបានព្យាយាម ប៉ុន្តែមិនអាចវារចេញពីរណ្តៅខ្មៅងងឹតនេះបានឡើយ។ វាហាក់ដូចជាពពកខ្មៅមួយបានរុំព័ទ្ធចិត្តគំនិត ជីវិត និងអនាគតរបស់នាង។
មេនឌីចាប់ផ្តើមមានអាការៈថប់បារម្ភធ្ងន់ធ្ងរ ឬការភ័យស្លន់ស្លោជាញឹកញាប់ ដោយភ្ញាក់ពីដំណេកនៅពេលអធ្រាត្រ និងថប់ដង្ហើម ហើយបេះដូងរបស់នាងលោតញាប់ដោយការភ័យខ្លាចដែលមិនអាចពន្យល់បាន។ ការវាយប្រហារទាំងនេះជារឿយៗបានធ្វើឲ្យនាងត្រូវគេបញ្ជូនទៅក្នុងបន្ទប់សង្គ្រោះបន្ទាន់។ ដោយមិនអាចទ្រាំទ្រនឹងការភ័យខ្លាចជាខ្លាំង និងការធ្វើទារុណកម្មទាំងអស់នេះបាន នាងបានព្យាយាមបញ្ចប់ជីវិតរបស់នាងជាច្រើនលើកច្រើនសា។
មេនឌីអាចនឹងក្លាយជាតួលេខមួយទៀតនៅក្នុងស្ថិតិធ្វើអត្តឃាត ប្រសិនបើមិនមែនដោយសារបងប្រុសរបស់នាង ដែលមកសួរសុខទុក្ខនាង ចែករំលែកអំពីព្រះយេស៊ូវជាមួយនាង និងអញ្ជើញនាងឲ្យទៅចូលរួមក្នុងក្រុមជំនុំទេនោះ។ ដំបូងឡើយ មេនឌីរឹងទទឹង ប៉ុន្តែទីបំផុតនាងបានទៅក្រុមជំនុំ នៅពេលដែលនាងមានបំណងចិត្តដោយមិនអាចពន្យល់បានចង់ចូលរួមវេនថ្វាយបង្គំនៅក្រុមជំនុំនាថ្ងៃអាទិត្យមួយ។ នៅថ្ងៃនោះ ជីវិតរបស់នាងត្រូវបានផ្លាស់ប្តូរជារៀងរហូត។ នាងបានចែករំលែកថា ៖
ថ្ងៃអាទិត្យនោះ ក្នុងអំឡុងពេលថ្វាយបង្គំ មានអ្វីមួយបានប៉ះពាល់ដល់ខ្ញុំយ៉ាងជ្រាលជ្រៅ ហើយទឹកភ្នែករបស់ខ្ញុំស្រាប់តែហូរ។ ក្នុងអំឡុងពេលស្ដាប់សេចក្ដីអធិប្បាយ ព្រះយេស៊ូវបានបើកសម្តែងអង្គទ្រង់ដល់ខ្ញុំ។ ពីមុន ខ្ញុំគ្រាន់តែបានឮអំពីទ្រង់ ប៉ុន្តែដូចដែលលោកគ្រូព្រីនស៍បានចែករំលែកអំពីទំនុកតម្កើង ៩១ ដែរ ព្រះអម្ចាស់បានបង្ហាញសេចក្ដីស្រឡាញ់របស់ទ្រង់ដល់ខ្ញុំ ៖ សេចក្ដីស្រឡាញ់ដ៏ស្រស់ស្អាតរបស់ព្រះអង្គសង្គ្រោះដែលបានសុគតសម្រាប់ខ្ញុំ ដោយបង់ថ្លៃលោះដើម្បីផ្ដល់ជីវិតដ៏បរិបូរដល់ខ្ញុំ។ ចាប់ពីថ្ងៃនោះមក អាការៈថប់បារម្ភធ្ងន់ធ្ងរ ឬការភ័យស្លន់ស្លោមិនដែលត្រលប់មកវិញទេ។ គ្រូពេទ្យចិត្តសាស្រ្តដែលគង់នៅស្ថានសួគ៌របស់ខ្ញុំ គឺព្រះយេស៊ូវ បានរំដោះខ្ញុំពីកណ្តាប់ដៃរបស់ជំងឺធ្លាក់ទឹកចិត្តដ៏ថប់ដង្ហើមនោះ។
កាលណាអ្នកឃើញអត្តសញ្ញាណពិតរបស់អ្នកនៅក្នុងព្រះគ្រីស្ទកាន់តែច្រើន គំនិតអំពីសេចក្តីសុខសាន្ត និងគោលបំណងនឹងជំនួសកន្លែងគំនិតដែលបរាជ័យ និងការថ្កោលទោសទាំងនោះកាន់តែច្រើន។
បន្ទាប់ពីទទួលបានការបើកសម្តែងផ្ទាល់ខ្លួនអំពីសេចក្ដីស្រឡាញ់របស់ព្រះអម្ចាស់ចំពោះនាង រឿងមួយក្នុងចំណោមរឿងដំបូងដែលមេនឌីបានកត់សម្គាល់ឃើញគឺថា ដំណើរការគិតរបស់នាងបានចាប់ផ្តើមផ្លាស់ប្តូរ។ គំនិតដូចជា ខ្ញុំមិនស្អាត ខ្ញុំកខ្វក់ ហើយខ្ញុំជាមនុស្សបរាជ័យ បានចាប់ផ្តើមជំនួសដោយគំនិតដូចជា ព្រះយេស៊ូវស្រឡាញ់ខ្ញុំយ៉ាងខ្លាំង ទើបទ្រង់បានសុគតសម្រាប់ខ្ញុំ ហើយខ្ញុំគឺជាបុត្រស្ងួនភ្ញារបស់ទ្រង់។ នាងកាន់តែចាប់ផ្តើមឃើញអត្តសញ្ញាណពិតរបស់នាងនៅក្នុងពន្លឺនៃព្រះគុណរបស់ព្រះ គំនិតអំពីសេចក្តីសុខសាន្ត និងគោលបំណងកាន់តែច្រើនបានចាប់ផ្តើមជំនួសគំនិតដែលបរាជ័យ គំនិតអំពីការថ្កោលទោស រហូតដល់ពួកវាបាត់បង់ទីតាំងឈរជើងរបស់ពួកវានៅក្នុងចិត្តរបស់នាងទាំងស្រុង។ នាងបាននិយាយថា ៖
ឥឡូវនេះ ពេលខ្ញុំឆ្លុះកញ្ចក់ ខ្ញុំឃើញបុត្រដ៏ជាទីស្រឡាញ់របស់ព្រះដែលមានគោលបំណងរស់នៅ ហើយគោលបំណងនេះគឺទ្រង់។ សេចក្ដីស្រឡាញ់របស់ទ្រង់មិនចេះរីងស្ងួត ហើយខ្ញុំដឹងថាទ្រង់ស្រឡាញ់ខ្ញុំទោះបីជាខ្ញុំមានកំហុសក៏ដោយ។ ខ្ញុំមិនល្អឥតខ្ចោះទេ។ ខ្ញុំនៅតែធ្វើខុស ប៉ុន្តែខ្ញុំដឹងថាភាពល្អឥតខ្ចោះរបស់ខ្ញុំគឺព្រះគ្រីស្ទ ហើយខ្ញុំកាន់តែយល់អំពីកិច្ចការដែលទ្រង់បានបញ្ចប់ច្រើនប៉ុណ្ណា ខ្ញុំកាន់តែឃើញថាខ្ញុំបានទទួលការផ្លាស់ប្រែប៉ុណ្ណោះ។
បងប្អូនអើយ ទីបន្ទាល់ដ៏មានតម្លៃនេះគឺគ្រាន់តែជាទីបន្ទាល់មួយក្នុងចំណោមទីបន្ទាល់ជាច្រើនដែលខ្ញុំបានទទួលពីមនុស្សដែលបានទទួលការជួយសង្គ្រោះដោយព្រះគុណរបស់ព្រះអម្ចាស់ចេញពីរណ្តៅនៃការធ្លាក់ទឹកចិត្ត និងគំនិតដែលអស់សង្ឃឹម ក៏ដូចជាគំនិតដែលបរាជ័យ។ គ្រាន់តែការទទួលបានសេចក្ដីស្រឡាញ់ និងព្រះគុណរបស់ព្រះយេស៊ូវចំពោះពួកគេ បានផ្តល់ឲ្យពួកគេនូវអំណាចដើម្បីមានសេរីភាពពីច្រវាក់ដែលមើលមិនឃើញ ដែលបានចងពួកគេ។ ហើយពួកគេបានបន្តមានបទពិសោធពីការទម្លុះទម្លាយម្តងហើយម្តងទៀតនៅក្នុងជីវិតរបស់ពួកគេ។
សព្វថ្ងៃមានមនុស្សជាច្រើនរងទុក្ខដោយសារគំនិតអន្ទះអន្ទែង និងគំនិតដែលធ្វើឲ្យធ្លាក់ទឹកចិត្ត គំនិតដែលធ្វើឲ្យពួកគេសោកសៅ បរាជ័យ និងមិនអាចក្រោកចេញឆ្ងាយពីការឈឺចាប់ និងការខកចិត្តពីអតីតកាលបាន។ មានមនុស្សជាច្រើនដែលមិត្តភក្តិ និងក្រុមគ្រួសាររបស់ពួកគេមិនបានដឹង កំពុងដោះស្រាយជាមួយនឹងគំនិតបរាជ័យដូចជា មេនឌី ដែលធ្វើឲ្យពួកគេមានអារម្មណ៍ថាពួកគេមិនស្អាត និងគ្មានតម្លៃ។ នៅពេលដែលគំនិតទាំងនេះត្រូវបានអនុញ្ញាតឲ្យលូតលាស់ និងចាក់ឫស គំនិតទាំងនេះអាចនាំពួកគេឲ្យដើរលើផ្លូវដែលមានភាពអសន្តិសុខគ្មានទីបញ្ចប់ បញ្ហាសង្គម ការញៀនធ្ងន់ធ្ងរ ជំងឺ ថែមទាំងសេចក្តីស្លាប់ទៀតផង។
ជាបញ្ហាជាប់ស្ទះទូទៅមួយ ប៉ុន្តែព្រះសព្វព្រះហឫទ័យឲ្យយើងមានសេរីភាព
គំនិតអវិជ្ជមានវាយប្រហារយើងទាំងអស់គ្នា។ ដោយមិនលើកលែងនរណាម្នាក់ឡើយ ពួកវាមកដោយមិនបានអញ្ជើញ ជួនកាលបង្កឡើងដោយសាររឿងតូចតាចបំផុត។ សម្រាប់មនុស្សមួយចំនួន ពាក្យសម្តីមួយម៉ាត់ ការសម្លឹងមើល ឬការជួបប្រទះស្ថានភាពដែលធ្លាប់ជួប អាចចាប់ផ្តើមខ្សែច្រវាក់នៃគំនិតអាក្រក់ៗដែលអាចកើនឡើងហួសពីការគ្រប់គ្រង ហើយនាំពួកគេទៅកាន់កន្លែងដ៏គួរឲ្យភ័យខ្លាច និងឯកោ។
អ្នកអាចជាស្វាមីដែលចូលចិត្តគិតថា ប្រពន្ធ និងកូនៗរបស់ខ្ញុំមិនគោរពខ្ញុំទេ។ ក្នុងនាមជាមេគ្រួសារ ខ្ញុំជាមនុស្សបរាជ័យ។ ឬប្រហែលជាគំនិតអំពីការទៅសាលារៀន ឬទៅធ្វើការនៅពេលព្រឹកធ្វើឲ្យអ្នកភ័យខ្លាច ព្រោះអ្នកគិតថា មនុស្សម្នាមិនចូលចិត្តខ្ញុំទេ។ អ្វីគ្រប់យ៉ាងដែលខ្ញុំធ្វើហាក់ដូចជាខុសទាំងអស់។ ខ្ញុំបានជួបមិត្តជាទីស្រឡាញ់ដែលនៅឆ្ងាយពីក្រុមជំនុំ ដោយសារតែគំនិតដូចជា ព្រះជាម្ចាស់ប្រឆាំងនឹងខ្ញុំ។ ទ្រង់មិនស្រឡាញ់ខ្ញុំទេ។ ខ្ញុំបន្តធ្វើខុស។
បងប្អូនអើយ ខ្ញុំផ្ទាល់ដឹងថាការរងទុក្ខដោយសារគំនិតអវិជ្ជមានទាំងនោះវាបែបណា។ កាលខ្ញុំនៅជាក្មេងជំទង់ ដោយសារតែខ្ញុំបានអានរឿងមួយ ខ្ញុំបានជឿថាខ្ញុំបានប្រព្រឹត្ត «អំពើបាបដែលមិនអាចអត់ទោសបាន» ហើយបានបាត់បង់សេចក្ដីសង្គ្រោះរបស់ខ្ញុំហើយ។ ខ្ញុំចាប់ផ្ដើមមានគំនិតអាក្រក់ៗគ្រប់បែបយ៉ាងអំពីជីវិត និងវាសនារបស់ខ្ញុំ។ ខ្ញុំជឿថាខ្ញុំនឹងធ្លាក់ទៅឋាននរក។ ខ្ញុំថែមទាំងមានគំនិតប្រមាថព្រះ ហើយមានការគិតមមៃអំពីការលន់តួបាបរបស់ខ្ញុំចំពោះទ្រង់ដោយអត់មិនបាន។ ខ្ញុំនឹងឈប់សិន ហើយលន់តួបាបនៅពេលកំពុងតែមានការសន្ទនា ឬការប្រកួតបាល់ទាត់! ខ្ញុំមានអារម្មណ៍តានតឹងក្នុងចិត្តយ៉ាងខ្លាំង រហូតដល់ខ្ញុំស្ទើរតែឆ្កួតទៅហើយ។ ហើយគំនិតដែលថាស្មារតីរបស់ខ្ញុំអាចនឹងគ្រប់គ្រងលែងបាន នៅពេលណាមួយនោះ ពិតជាធ្វើឲ្យខ្ញុំភ័យខ្លាចខ្លាំងណាស់!
ក្នុងនាមជាគ្រីស្ទបរិស័ទ អំពើបាបទាំងអស់របស់អ្នកបានទទួលការអត់ទោសរួចហើយតាមរយៈយញ្ញបូជាដ៏ល្អឥតខ្ចោះរបស់ព្រះយេស៊ូវ។
ប៉ុន្តែ ព្រះបានរំដោះខ្ញុំឲ្យមានសេរីភាពនៅក្នុងព្រះគុណរបស់ទ្រង់។ ទ្រង់បានបើកសម្ដែងដំណឹងល្អនៃព្រះគុណដល់ខ្ញុំ ៖ របៀបដែលអំពើបាបទាំងអស់របស់ខ្ញុំបានទទួលការអត់ទោសរួចហើយតាមរយៈយញ្ញបូជាដ៏ល្អឥតខ្ចោះរបស់ព្រះយេស៊ូវ និងរបៀបដែលខ្ញុំបានរាប់ជាសុចរិតដោយសារជំនឿ មិនមែនដោយសារការប្រព្រឹត្តរបស់ខ្ញុំទេ។ ខ្ញុំបានទទួលការធានាអះអាងពេញដោយព្រះពរអំពីសេចក្ដីសង្គ្រោះរបស់ខ្ញុំ ហើយខ្ញុំដឹងនៅក្នុងចិត្តរបស់ខ្ញុំថា ស្ថានសួគ៌គឺជាផ្ទះរបស់ខ្ញុំ។ ខ្ញុំនៅតែចាំពីពេលដែលខ្ញុំបានទទួលការរំដោះឲ្យមានសេរីភាព ៖ វាដូចជារង្វង់ដែកដ៏តឹងដែលរុំព័ទ្ធជុំវិញក្បាលខ្ញុំទើបតែបាក់ ហើយធ្លាក់ចុះមក ហើយខ្ញុំបានទទួលបទពិសោធពីសេចក្តីសុខសាន្ត និងសេរីភាពដ៏អស្ចារ្យរបស់ទ្រង់!
អត្ថបទនេះត្រូវបានសរសេរជាច្បាប់ដើម ជាភាសាអង់គ្លេសដោយគ្រូគង្វាល យ៉ូសែប ព្រីនស៍។
ធនធានបន្ថែមទៀតដែលដូចធនធាននេះ
ចូរប្រយ័ត្នចំពោះគ្រោះថ្នាក់នៃព្រះគុណក្លែងក្លាយ
យើងរស់នៅក្នុងសម័យកាលដ៏គួរឲ្យរំភើប។ ព្រះអម្ចាស់ព្រះយេស៊ូវគ្រីស្ទរបស់យើងពិតជាកំពុងស្ដារឡើងវិញនូវដំណឹងល...
ព្រះអម្ចាស់នឹងប្រទានថ្វីមាត់ និងប្រាជ្ញាដល់អ្នកសម្រាប់គ្រប់ស្ថានភាពទាំងអស់ក្នុងជីវិតរបស់អ្នក
ព្រះចង់ឲ្យអ្នកជឿទាំងអស់ទទួលបានព្រះវិញ្ញាណនៃប្រាជ្ញា។ ការមានព្រះវិញ្ញាណបរិសុទ្ធនៅក្នុងអ្នកគឺជារឿងមួ...
សេចក្ដីសុចរិតជាអំណោយ
អ្នកមិនអាចទទួលបានព្រះពរពីព្រះតាមរយៈការប្រព្រឹត្តល្អរបស់អ្នកឡើយ។ ព្រះពរទាំងអស់របស់ទ្រង់ រួមទាំងព្រះព...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ៣/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ២/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ៣/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអ...
ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ១/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអ...
ជាវជាប្រចាំ