தேவனுடைய கிருபையினாலே மகள்களுடனான உறவு மீட்கப்பட்டது

என்னுடைய பிள்ளைகள் கிறிஸ்தவ குடும்பத்தில் வளர்க்கப்பட்டார்கள். சிறுவயதிலேயே இரட்சிக்கப்பட்டார்கள். சில வருடங்களுக்கு முன்பாக 20 வயதான என்னுடைய மகள் வீட்டை விட்டு வெளியேறிவிட்டாள், எங்கள் குடும்பத்தோடு தொடர்பு கொள்ளுவதை நிறுத்திவிட்டாள், போதைப் பொருட்களுக்கு அடிமையாகி, மரபுகளை விட்டு, செய்ய தகாத பழக்கங்களில் ஈடுபட்டாள். அவள் வியாகுலத்தினாலும் வேதனையின் தாக்குதலினாலும் மிகவும் பாதிக்கப்பட்டாள். அவளை அப்படி பார்ப்பது மிகவும் வேதனையாக இருந்தது, ஏனென்றால் உங்களுக்கு அவளைத் தெரிந்திருந்தால் அவள் எவ்வளவு இனிமையானவள், இப்படிப்பட்ட அழகான மகள் வேண்டும் என்று நினைப்பீர்கள்.

என்னுடைய இளைய மகளும் பள்ளியில் பல்வேறு காரியங்களை கடந்து வந்ததில் முழுவதும் மோசமாக நடந்து கொள்ளவும், தொடர்ந்து பொய் சொல்லவும், இங்கும் அங்கும் அலைந்து திரியவும், காயப்படுத்தும் விதமான செயல்களில் ஈடுபடவும் ஆரம்பித்தாள். அவர்கள் இருவரும் தேவனுக்கடுத்த காரியங்களில் தொடர்பு இல்லாதவர்களாக தங்களையும் தங்கள் குடும்பத்தையும் ஆபத்தில் இழுத்துக் கொண்டு இருந்தார்கள். அது வருத்தத்தையும் ஏமாற்றத்தையும் கொடுத்தது. நான் அவர்கள் இருவரையும் நேசித்தேன். அவர்களுக்கு சிறந்ததை தர விரும்பினேன். அவர்கள் தொடர்ந்து காயமின்றி வேதனையின்றி விடுதலையில் வாழ விரும்பினேன். அவர்களுடனான எனது உறவு மிகவும் பாதிக்கப்பட்டு மறுபடியும் இணையக்கூடாதபடி உடைந்து போனது போல காணப்பட்டது.

ஒரு சில முறைகள் பாஸ்டர் பிரின்ஸ் அவர்களின் ஊழியத்திற்கு கடிதம் எழுதி என்னுடைய மகள்களுக்காக ஜெபிக்கும்படி கேட்டுக்கொண்டேன். நான் அவர்களுக்கும் எனது குடும்பத்திற்கும் பாதுகாப்பும் சுகமும் மீட்கப்படுதலும் விடுதலையும் உண்டாகும்படி ஜெபித்துக் கொண்டிருந்தேன். அவர்களுடைய இப்படிப்பட்ட சுபாவத்தின் மத்தியிலும் அவர்கள் தங்களை குறித்து என்ன யோசித்து கொண்டு இருந்தாலும் அவர்கள் கிறிஸ்துவுக்குள் தேவனுடைய நீதியாய் இருக்கிறார்கள், மீட்கப்பட்டவர்களாய், மன்னிக்கப்பட்டவர்களாய், சுத்திகரிக்கப்பட்டவர்களாய் இருக்கிறார்கள் என்று நான் விசுவாசித்தேன். அவர்கள் மீது இயேசுவின் இரத்தத்தை நான் பிரகடனம்பண்ணி அவர்களுடைய இருதயம் தேவன் பக்கமாகவும், அவர்கள் குடும்பத்தின் பக்கமாகவும் திரும்பும் என்று அறிக்கை செய்து கொண்டு இருந்தேன்.

கர்த்தர் என் ஜெபங்களை கேட்டு என் உறவுகளை மீட்டுக் கொடுத்திருக்கிறார். இப்போது எனது மகள்களும் நானும் முன்பு ஒருபோதும் இல்லாத வண்ணம் சிறந்த உறவில் காணப்படுகிறோம். நாங்கள் நேர்மையாக உரையாடுகிறோம், ஒருவரை ஒருவர் நேசிக்கிறோம். எல்லாவற்றிற்கும் மேலாக இயேசுவின் அன்பில் இளைப்பாறிக் கொண்டிருக்கிறோம். எங்களுடைய இந்த உறவுகள் மீட்கப்பட்டதற்கான ஒரே காரணம் தேவனுடைய கிருபை என்பதை நான் அறிந்திருக்கிறேன்.

இந்தப் பகுதியில் நான் இன்னும் தேவனுடைய அதிகப்படியான தயவை பெற்றுக் கொள்ளும்படி தேவனை விசுவாசிக்கிறேன், எங்களுடைய உறவில் எங்களுக்குள்ளும், எங்களை தொடர்பு கொள்ளுகிற எல்லாருக்கும் அதிகப்படியான ஆசீர்வாதங்கள் உண்டாயிருக்கும்படி தொடர்ந்து பிரகடனம் பண்ணுகிறேன்.

பாஸ்டர் பிரின்ஸ், அன்பும் தேவனுடைய அழகான கிருபையும் நிறைந்த உங்களுடைய அருமையான ஊழியத்திற்காய் உங்களுக்கு நன்றி.