தேவ கிருபையால் தோற்றுப்போனவன் என்பதிலிருந்து முன்னணி மாணவனாக

என் மேல்நிலைப் பள்ளி நாட்களில், நான் மிகவும் குறும்புத்தனமாக முரடனாக இருந்தேன், எனது நண்பர்களுக்கு, பள்ளிக்கு மற்றும் குடும்பத்திற்கு பல பிரச்சனைகளை ஏற்படுத்தினேன். கும்பல்களில் ஈடுபட்டு, என்னையும் என்னை நேசித்தவர்களையும் காயப்படுத்தும் செயல்களில் ஈடுபட்டிருந்தேன்.

நான் ஒரு கிறிஸ்துவ குடும்பத்தில் வளர்ந்தாலும், தகப்பனாகிய தேவனின் அன்பை பற்றி அதிகம் அறியவில்லை. தேவனை நான் எப்போதும் தவறு செய்தால் திட்டத் தயாராக இருக்கும் கோபமான ஒரு முதியவராகவே நினைத்தேன், நான் பாவம் செய்யும் ஒவ்வொருமுறையும் நரகத்திற்கு செல்வேன் என்று நினைத்தேன். யாரும் என்னை நேசிக்கவில்லை என்றும் எப்போதும் சோகத்திலும் தனிமையிலும் இருப்பதாக உணர்ந்தேன்.

ஒரு நாள், மறுபடியுமாக பிரச்சனையில் சிக்கி, 12 மணிநேரம் சிறையில் அடைக்கப்பட்டேன். அப்போது கூட நான் மிகவும் பிடிவாதமாக இருந்து என் நண்பனை காப்பாற்ற பொய்யான வாக்குமூலங்கள் அளித்து அதிகாரிகளிடம் பொய் சொன்னேன். எட்டாவது மணி நேரத்தில், உதவி வேண்டி ஜெபிக்கும்படியான ஒரு உந்துதல் உண்டானது. குளிரான தரையில் நடுங்கிக் கொண்டிருந்தபோது, வெளியேறியதும் சபைக்கு போவேன் என்று முடிவு செய்தேன். ஒரு நண்பன் என்னை நியூ கிரியேஷன் சபைக்கு அழைத்து வந்தான்!

கிருபையினாலே, இயேசு என்னுடைய ஸ்தானத்தை எடுத்து சிலுவையில் என் பாவங்களுக்காக என்னுடைய மரணத்தை ஏற்றுக்கொண்டு மரித்ததினால் நான் தேவனுடைய முன்னிலையில் உள்ள என் நிலையை ஒருபோதும் இழக்கமாட்டேன் என்பதை கற்றுக்கொண்டேன்! இயேசுவுக்கே ஸ்தோத்திரம்! நான் வார்த்தையை உட்கொள்ள ஆரம்பித்தேன் மேலும் பாஸ்டர் பிரின்ஸின் பிரசங்கங்களை என்னுடைய தொலைபேசியில் பதிவிறக்கம் செய்துகொண்டேன்.

‘N’ லெவல் மற்றும் அதன்பின் ‘O’ லெவல் தேர்வுகளுக்காக ஆண்டவரை நம்ப கற்றுக்கொண்டேன். என் அனைத்து தேர்வு பதிப்பேடுகளையும் அபிஷேகம் செய்தேன், மேலும் ஒரு கிறிஸ்துவ நண்பரை அழைத்துச் சென்று, ஜெபித்து, தேர்வுக்கு முன் திருவிருந்தை எடுத்தோம். இரண்டு அல்லது மூன்று பேர் இயேசுவின் நாமத்தில் கூடும்போது, அவர் அவர்கள் நடுவில் இருப்பார் என்பதை நாங்கள் உறுதி செய்துகொண்டோம்! (மத்தேயு 18:20)

அதிசயமாக, என்னுடைய “N ‘’ லெவல் முடிவுகள் என்னை பள்ளியின் முதல் மூன்று மாணவர்களில் ஒருவனாக செய்தது! ‘O’ லெவலிலும் 10 பாயிண்ட் பெற்றேன், மேலும் பல ஜூனியர் கல்லூரிகளில் சேர தகுதியானவனாக இருந்தேன்!

இயேசு யார் என்பதை உண்மையாக வெளிப்படுத்திய பாஸ்டர் பிரின்ஸின் பிரசங்கத்திற்காக நான் மிகவும் நன்றியுள்ளவனாக இருக்கிறேன். எனது வாழ்க்கையில் நடந்த அனைத்திற்காகவும் நான் இயேசுவுக்கே மகிமை செலுத்த விரும்புகிறேன்; அவர் இல்லையென்றால் இன்று நான் “சமூகக் சீர்கேடானவனாக” இருந்திருப்பேன். ஆனால் இயேசு என்னை தோல்வியாளன் என்பதிலிருந்து முன்னணி மாணவனாக மாற்றினார்! ஆண்டவருக்கு ஸ்தோத்திரம்!