ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ១/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអាចរកព្រះគុណដ៏បរិបូរហូរហៀររបស់ព្រះសម្រាប់អ្នកបាន ដើម្បីបំផ្លាស់បំប្រែអ្នក ឬស្ថានភាពរបស់អ្នកហួសពីអ្វីដែលអ្នកអាចស្រមៃដល់។ នៅក្នុងអត្ថបទជាស៊េរីដែលមានបីភាគនេះ លោកគ្រូយ៉ូសែប ព្រីនស៍ បង្ហាញអ្នកពីមូលហេតុដែលបំណងព្រះហឫទ័យព្រះនៅតែផ្គត់ផ្គង់ព្រះគុណរបស់ទ្រង់ដល់អ្នក ទោះបីជាអ្នកបានបរាជ័យក៏ដោយ និងរបៀបដែលអ្នកអាចទទួលបានព្រះគុណនោះ។ សូមស្វែងយល់ផងដែរអំពីរបៀបដែលព្រះនៅតែអាចប្រើអ្នកសម្រាប់សិរីល្អរបស់ទ្រង់បាន ទោះបីជាអ្នកធ្លាប់មានកំហុសពីអតីតកាលក៏ដោយ។
សូមផ្តោតលើព្រះគុណរបស់ទ្រង់ កុំផ្តោតលើការបរាជ័យរបស់អ្នក
មានគូស្វាមីភរិយាដ៏គួរឲ្យស្រឡាញ់មួយគូដែលមានអាយុជាងសែសិបឆ្នាំមកពីរដ្ឋញូជឺស៊ី បានសរសេរសំបុត្រមកខ្ញុំថ្មីៗនេះ ដោយចែករំលែកទីបន្ទាល់របស់ពួកគេអំពីរបៀបដែលព្រះបានធ្វើឲ្យពួកគេមានកូនដែលពួកគេចង់បានអស់រយៈពេលជាងដប់មួយឆ្នាំមកហើយ។ ពួកគេបានព្យាយាមគ្រប់មធ្យោបាយទាំងអស់ រួមទាំង ការធ្វើ IVF (ការបង្កកំណើតក្នុងវីត្រូ) ដើម្បីមានកូន ប៉ុន្តែទីបំផុតគេប្រាប់ថាតាមបែបវេជ្ជសាស្រ្តវាមិនអាចទៅរួចទេសម្រាប់ពួកគេក្នុងការមានកូនដោយខ្លួនឯង។
ថ្ងៃមួយ ពួកគេបានឃើញការចាក់ផ្សាយតាមទូរទស្សន៍របស់ខ្ញុំ ហើយបានឮអំពីសារនៃព្រះគុណរបស់ព្រះជាលើកដំបូង និងរបៀបដែលព្រះយេស៊ូវបានបង់ថ្លៃពេញលេញសម្រាប់ពួកគេ ដើម្បីឲ្យពួកគេមានអ្វីគ្រប់យ៉ាងដែលពួកគេត្រូវការ។ វាគឺជាសារមួយដែលគូស្វាមីភរិយាមួយគូនេះបានចាប់យកដោយចិត្តស្រេកឃ្លាន ហើយនិងបន្តទទួលយក។ មិនយូរប៉ុន្មាន ពួកគេបានទទួលដំណឹងដ៏អស្ចារ្យដែលភរិយាគាត់បានចែករំលែកជាមួយខ្ញុំដោយរីករាយថា «លោកគ្រូ ព្រីនស៍ ឥឡូវនេះខ្ញុំមានផ្ទៃពោះប្រាំមួយសប្តាហ៍ហើយ។ សូមសរសើរតម្កើងព្រះអម្ចាស់!»
ខ្ញុំសូមចែករំលែកការទម្លុះទម្លាយដ៏អស្ចារ្យមួយទៀត ដែលមានបងប្រុសម្នាក់ទៀតដែលបានតាមដានការចាក់ផ្សាយតាមទូរទស្សន៍របស់ខ្ញុំបានជួបប្រទះ។ បុរសម្នាក់នេះបានរៀបរាប់អំពីរបៀបដែលគាត់បានព្យាយាម ហើយបានបរាជ័យជាច្រើនលើកច្រើនសាក្នុងការយកឈ្នះលើការសេពគ្រឿងស្រវឹង និងការញៀនខាងផ្លូវភេទ។
ជាព្រះគុណដ៏អស្ចារ្យ និងបរិបូររបស់ព្រះ ដែលនឹងផ្ដល់ជ័យជម្នះដល់អ្នកលើចំណុចខ្សោយរបស់អ្នក
គាត់បានចែករំលែកថា «ធ្វើអ្វីក៏មិនបានការដែរ រហូតដល់ខ្ញុំបានរកឃើញ និងទទួលការបើកសម្តែងអំពីដំណឹងល្អនៃព្រះគុណតាមរយៈការអធិប្បាយរបស់លោកគ្រូ និងតាមរយៈការអានអត្ថបទក្នុងការចំណាយពេលជាមួយព្រះជាប្រចាំថ្ងៃរបស់លោកគ្រូ»។ «ហើយនៅពេលដែលខ្ញុំថ្វាយបញ្ហាជាប់ស្ទះរបស់ខ្ញុំដល់ព្រះ ដើម្បីឲ្យទ្រង់ដោះស្រាយ ខ្ញុំប្រែជាមានសេរីភាព និងបានពេញលេញ។ ដោយព្រះចេស្ដានៃព្រះវិញ្ញាណបរិសុទ្ធ និងព្រះគុណរបស់ព្រះតាមរយៈព្រះរាជបុត្រារបស់ទ្រង់ ថ្ងៃនេះខ្ញុំជាមនុស្សដែលមានសេរីភាព។ ខ្ញុំនិយាយដូច្នេះដោយថ្វាយសិរីល្អដល់ព្រះ ៖ ខ្ញុំមិនអាចបញ្ឈប់ទម្លាប់អាក្រក់ទាំងនេះដោយខ្លួនឯងបានទេ»។
តើអ្វីទៅដែលបានផ្ដល់ការទម្លុះទម្លាយដល់ព្រលឹងមនុស្សដ៏មានតម្លៃទាំងនេះ?
វាមិនមែនជាឆន្ទៈ ការខិតខំ ឬការប្រឹងប្រែងផ្ទាល់ខ្លួនរបស់ពួកគេទេ។ វាមិនមែនជាការលត់ដំខ្លួនឯងជម្នះលើចំណុចខ្សោយដែលពួកគេបានឃើញនៅក្នុងខ្លួនគេនោះទេ។ ប៉ុន្តែគឺជាព្រះគុណដ៏បរិបូរហូរហៀររបស់ព្រះប៉ុណ្ណោះ!
បងប្អូនជាទីស្រឡាញ់ ទោះបីជាមានបញ្ហាអ្វីដែលអ្នកកំពុងមានជាប់ស្ទះនៅថ្ងៃនេះក៏ដោយ អ្នកក៏អាចមានជ័យជម្នះដែរ។ ដូចបង្ហាញតាមរយៈទីបន្ទាល់ខាងលើ វាគឺជាព្រះគុណដ៏អស្ចារ្យ និងបរិបូររបស់ព្រះ ដែលនឹងប្រទានឲ្យអ្នកមានជ័យជម្នះលើចំណុចខ្សោយរបស់អ្នក ហើយបំផ្លាស់បំប្រែជីវិតរបស់អ្នកសម្រាប់សិរីល្អរបស់ទ្រង់!
កន្លែងដែលមានព្រះគុណដ៏បរិបូរ
ចំណុចខ្សោយ ឬគុណវិបត្តិរបស់អ្នកអាចជាផ្នែកមួយនៃបញ្ហាជាប់ស្ទះរបស់អ្នកនៅពេលនេះ ប៉ុន្តែយោងតាមព្រះគម្ពីររបស់ខ្ញុំ វាក៏ជាគោលដៅដ៏ល្អឥតខ្ចោះ និងជាទីតាំងនៅ នៃព្រះគុណដ៏បរិបូរហូរហៀររបស់ព្រះ នៅពេលឥឡូវនេះផងដែរ។
រ៉ូម ៥:២០ ប្រាប់យើងយ៉ាងច្បាស់ថា «កន្លែងណាដែលមានបាបចម្រើនជាបរិបូរឡើង នោះព្រះគុណក៏ចម្រើនជាបរិបូរលើសទៅទៀត»។ អ្វីដែលខគម្ពីរនេះសំដៅលើនោះគឺថា ទីណាដែលមាន «ការបរាជ័យក្នុងការសម្រេចគោលដៅ» (និយមន័យនៃ «អំពើបាប» ដោយវចនានុក្រមក្រិករបស់ Thayer (Thayer’s Greek Lexicon)) នោះជាកន្លែងដែលព្រះគុណរបស់ព្រះ ជាព្រះគុណដែលមិនសមនឹងទទួលបានសម្រាប់ការពង្រឹងសិទ្ធិអំណាច និងជ័យជំនះរបស់យើង ស្ថិតនៅក្នុងកម្រិតដ៏បរិបូរ។
ពិតជាអស្ចារ្យណាស់ មែនទេ? ផ្ទុយពីការគិតបែបប្រពៃណី ព្រះគុណរបស់ព្រះមិនបោះបង់ចោលអ្នកទេ នៅពេលដែលអ្នកមិនសម្រេចគោលដៅ។ វាជាការលួងលោម និងជាប្រភពនៃកម្លាំងយ៉ាងណាទៅ ដែលដឹងថាព្រះគុណរបស់ទ្រង់មិនចាកចេញពីយើងទេ ប៉ុន្តែស្ថិតនៅជាមួយយើង នៅពេលដែលយើងកំពុងតែមានចំណុចខ្សោយដ៏ឈឺចាប់ ការបរាជ័យ និងស្ថានភាពមិនល្អឥតខ្ចោះ!
សូមមើលព្រះគុណដ៏បរិបូររបស់ព្រះ
ការយល់ដឹងពីគម្ពីររ៉ូម ៥:២០ គឺជាគន្លឹះក្នុងការអនុញ្ញាតឲ្យព្រះគុណរបស់ព្រះបំផ្លាស់បំប្រែផ្នែកនៃបញ្ហាជាប់ស្ទះរបស់អ្នក ទៅជាទីបន្ទាល់អំពីសេចក្តីល្អ និងព្រះចេស្ដារបស់ទ្រង់។ ដូច្នេះ ខ្ញុំសូមបង្ហាញភាពសម្បូរបែបនៃខគម្ពីរនេះដោយការចូលទៅមើលអត្ថន័យដើមជាភាសាក្រិករបស់ខនេះ។
ព្រះប្រទានព្រះគុណដ៏បរិបូរដល់អ្នកសម្រាប់ផ្នែកនៃបញ្ហារបស់អ្នក។
ពាក្យថា «បរិបូរ» នៅទីនេះគឺជាពាក្យក្រិកថា Pleonazo។ ពាក្យថា Pleonazo ជាធម្មតាមានន័យថាបរិបូរ ឬចម្រើនឡើង។ បើប្រៀបធៀប ពាក្យថា «បរិបូរលើសទៅទៀត» គឺជាពាក្យក្រិកតែមួយថា huperperisseuo។ មិនដូចពាក្យ pleonazo ទេ ពាក្យ huperperisseuo មានន័យថា បរិបូរលើសពីការវាស់ស្ទង់បាន បរិបូរក្រៃលែង ឬបរិបូរហូរហៀរ។
ពាក្យ Perisseuo មានន័យថាហូរហៀររួចទៅហើយ ប៉ុន្តែជាមួយនឹងពាក្យខាងដើមថា huper ដែលពាក្យជាភាសាអង់គ្លេសថា «hyper» វាក្លាយជាពាក្យថា huperperisseuo — បរិបូរហូរហៀរ។ អ្នកប្រាជ្ញជនជាតិក្រិកឈ្មោះថា Kenneth Wuest ចាប់យករូបភាពទាំងអស់នេះបានយ៉ាងល្អនៅក្នុងការបកប្រែខគម្ពីររបស់គាត់ថា «កន្លែងដែលបាបបានចម្រើនឡើង នោះព្រះគុណក៏បានចម្រើនឡើងបរិបូរ និងច្រើនបន្ថែមពីលើនោះទៀត»។ វាពិតជាអស្ចារ្យមែន!
តើរឿងទាំងអស់នេះមានន័យដូចម្តេចចំពោះអ្នក?
បងប្អូនអើយ វាមានន័យថា ព្រះមិនគ្រាន់តែប្រទានព្រះគុណដល់អ្នកឲ្យស្មើនឹងកម្រិតធ្ងន់ធ្ងរនៃចំណុចខ្សោយរបស់អ្នកប៉ុណ្ណោះទេ។ ទេ ទ្រង់ប្រទានព្រះគុណដល់អ្នកក្នុងកម្រិតមួយដ៏បរិបូរហូរហៀរ! ម្យ៉ាងវិញទៀត នៅក្នុងផ្នែកដែលមានបញ្ហារបស់អ្នក ព្រះបានបញ្ចេញព្រះគុណរបស់ទ្រង់ក្នុងកម្រិតដែលមិនសមាមាត្រ ឬធំជាងបញ្ហានោះ ដើម្បីឲ្យវាលេបយកអំពើបាប ឬចំណុចខ្សោយរបស់អ្នកទាំងស្រុង ហើយបំផ្លាស់បំប្រែជីវិតរបស់អ្នកពេញដោយសិរីល្អ!
ផ្លាស់ប្តូរការផ្តោតសំខាន់របស់អ្នក ៖ មើលអ្វីដែលព្រះកំពុងធ្វើ
តើផ្នែកដែលជាចំណុចខ្សោយរបស់អ្នកនៅថ្ងៃនេះជាអ្វី? ប្រហែលជាវាជាបញ្ហាជាមួយនឹងចរិតឆេវឆាវ ឬអ្នកកំពុងមានបញ្ហាជាប់ស្ទះជាមួយនឹងការញៀនដែលធ្វើឲ្យអ្នកមានអារម្មណ៍ថាមានកំហុស និងខ្មាសអៀនយ៉ាងខ្លាំង។ ប្រហែលជាអ្នកកំពុងស្វែងរកការងារ ហើយដឹងយ៉ាងច្បាស់ថាអ្នកមិនមានគុណសម្បត្តិដែលគេតម្រូវ ដើម្បីបំពេញការងារក្នុងក្តីស្រមៃរបស់អ្នកនោះទេ។ ប្រហែលជាអ្នកមានទំនោរទៅលើការជ្រើសយកជម្រើសមិនល្អក្នុងការសម្រេចចិត្តសំខាន់ៗ ហើយវាបាននាំមកនូវផលវិបាកដែលអ្នកមិនចង់បាននៅក្នុងជីវិតរបស់អ្នក។
អ្វីដែលមារសត្រូវចង់បាន គឺឲ្យអ្នកមានអារម្មណ៍ថាមានទោស បាក់ទឹកចិត្ត ហើយបោះបង់ចោល។ វាចង់ឲ្យអ្នកចូលទៅក្នុងជម្លោះដោយការន្ទោសអ្នកដទៃចំពោះបញ្ហារបស់អ្នក ហើយបញ្ចេញកំហឹងលើពួកគេ។ វាចង់ឲ្យអ្នករស់នៅក្នុងភាពភ័យខ្លាច ផ្តាច់ខ្លួនអ្នកចេញពីសហគមន៍គ្រីស្ទបរិស័ទរបស់អ្នក ហើយក្លាយជាមនុស្សដែលកាន់តែឯកាខ្លាំងឡើងៗជារៀងរាល់ថ្ងៃ។
សូមប្រើភ្នែកនៃជំនឿដើម្បីមើលឃើញថា ព្រះកំពុងធ្វើអ្វីដែលគួរឲ្យរំភើប អ្វីមួយដ៏អស្ចារ្យ អ្វីមួយដែលហួសពីក្តីស្រមៃដែលអ្នកអាចស្រមៃដល់នៅក្នុងព្រះគុណទ្រង់!
បងប្អូនអើយ ជំនួសឲ្យការអនុញ្ញាតឲ្យមារសត្រូវអូសអ្នកចុះឡើង និងទាញអ្នកទម្លាក់ដោយឧបករណ៍របស់វា ចូរដឹងថានៅក្នុងបញ្ហា ឬចំណុចខ្សោយរបស់អ្នក ព្រះបានចាក់បង្ហូរព្រះគុណដ៏បរិបូររបស់ទ្រង់មកលើអ្នករួចហើយ ហើយទ្រង់បានចាប់ផ្តើមអ្វីមួយដ៏អស្ចារ្យនៅក្នុងជីវិតរបស់អ្នករួចហើយ។
សូម្បីតែឥឡូវនេះ ព្រះគុណរបស់ទ្រង់មានវត្តមានក្នុងកម្រិតដ៏បរិបូរហូរហៀរនៅក្នុងស្ថានភាពរបស់អ្នក ដើម្បីអាចឲ្យអ្នកយកឈ្នះលើបញ្ហារបស់អ្នក និងបានទទួលបទពិសោធនៃជ័យជម្នះរបស់អ្នកនៅក្នុងព្រះគ្រីស្ទដែលទ្រង់បានលោះមកដោយព្រះលោហិតរបស់ទ្រង់។ ដល់ពេលហើយដែលត្រូវប្រើភ្នែកនៃជំនឿដើម្បីមើលឃើញថា ព្រះកំពុងធ្វើអ្វីដែលគួរឲ្យរំភើប អ្វីមួយដ៏អស្ចារ្យ អ្វីមួយដែលហួសពីក្តីស្រមៃដែលអ្នកអាចស្រមៃដល់នៅក្នុងព្រះគុណទ្រង់។
សូមមើលស្ថានភាពរបស់អ្នកដោយប្រើភ្នែកនៃជំនឿ
ការជំរុញចិត្តរបស់ខ្ញុំចំពោះអ្នកនៅថ្ងៃនេះគឺ តម្រូវឲ្យអ្នកមើលស្ថានភាពរបស់អ្នកដោយប្រើភ្នែកនៃជំនឿ។ សូមកុំចាញ់ល្បិចកល ឬការគំរាមកំហែងរបស់មារសត្រូវ ហើយបាក់ទឹកចិត្តឡើយ។ ចូរដឹងថា អ្វីក៏ដោយដែលអារក្សញុះញង់ ឬចាប់ផ្តើម គឺគ្រាន់តែជាការប៉ុនប៉ងបញ្ឈប់ ឬរំខានដល់អ្វីដែលព្រះបានចាប់ផ្តើមរួចហើយប៉ុណ្ណោះ។ យើងឃើញការនេះម្តងហើយម្តងទៀតនៅក្នុងរឿងពីព្រះគម្ពីរអំពីវីរបុរសនៃជំនឿរបស់ព្រះ។
សូមយកយ៉ូសែបនៅក្នុងព្រះគម្ពីរសញ្ញាចាស់ជាឧទាហរណ៍។ មារសត្រូវបានញុះញង់ឲ្យបងប្អូនរបស់យ៉ូសែបមានចិត្តច្រណែន ហើយបានបង្កើតផែនការមួយដើម្បីឲ្យបងប្អូនរបស់គាត់លក់យ៉ូសែបទៅប្រទេសអេហ្ស៊ីប នៅពេលដែលព្រះបានកំណត់វាសនាគាត់រួចជាស្រេចហើយ ឲ្យជួយសង្គ្រោះក្រុមគ្រួសាររបស់គាត់ និងពិភពលោកទាំងមូលពីគ្រោះទុរ្ភិក្សដ៏គួរឲ្យភ័យខ្លាចនៅពេលនោះ។ ព្រះបានប្រើអ្វីៗគ្រប់យ៉ាងដែលអារក្សបានទម្លាក់មកលើយ៉ូសែប ដើម្បីប្រែក្លាយវាជាមេរៀនដែលជួយដល់គាត់ រហូតដល់គាត់មើលឃើញយ៉ាងលម្អិតពីវាសនារបស់គាត់ដែលព្រះបានកំណត់។
ស្រដៀងគ្នានេះដែរ នៅពេលដែលយើងបានស្គាល់សាវ័កប៉ុលជាលើកដំបូងនៅក្នុងកណ្ឌគម្ពីរកិច្ចការ យើងមើលមិនទាន់ឃើញសាវ័ក បេសកជន និងសសរស្តម្ភដ៏អស្ចារ្យនៃជំនឿគ្រិស្តបរិស័ទនៅឡើយទេ។ ទេ យើងឃើញតែសុលដែលជា «ផារីស៊ីម្នាក់នៃពួកផារីស៊ី» និងជា «មេនៃមនុស្សបាប» កំពុងប្រឹងប្រែងអស់ពីសមត្ថភាពដើម្បីបៀតបៀនក្រុមជំនុំដំបូង។ ទោះជាយ៉ាងណាក៏ដោយ ព្រះបានត្រាស់ហៅគាត់តាំងពីក្នុងផ្ទៃម្តាយរបស់គាត់ ដើម្បីឲ្យអធិប្បាយ និងបើកសម្តែងដំណឹងល្អនៅកន្លែងជាច្រើន ដោយមានការបើកសម្តែង និងអំណាចជាច្រើន និងដើម្បីឲ្យសរសេរផ្នែកដ៏សំខាន់មួយនៃព្រះគម្ពីរសញ្ញាថ្មី។
តើគន្លងនៃជីវិតរបស់គាត់បានផ្លាស់ប្តូរនៅពេលណា? នៅពេលដែលគាត់បានរកឃើញបុគ្គលនៃព្រះគុណផ្ទាល់ គឺព្រះយេស៊ូវ នៅពេលដែលគាត់កំពុងធ្វើដំណើរទៅកាន់ទីក្រុងដាម៉ាស ដើម្បីចាប់ខ្លួនគ្រីស្ទបរិស័ទជាច្រើនបន្ថែមទៀត!
អ្វីដែលខ្ញុំចង់ឲ្យអ្នកឃើញនោះគឺ យុទ្ធសាស្ត្ររបស់មារសត្រូវគឺវាយប្រហារអ្នកនៅក្នុងផ្នែកដែលវាដឹងថាព្រះមានផែនការដ៏អស្ចារ្យសម្រាប់អ្នក។ ឧទាហរណ៍ ប្រសិនបើអ្នកកំពុងដោះស្រាយជាមួយនឹងជំងឺរ៉ាំរ៉ៃនៅក្នុងខ្លួនរបស់អ្នក ខ្ញុំសូមលើកទឹកចិត្តអ្នកឲ្យមើលទៅផែនការរបស់ព្រះសម្រាប់អ្នក ដើម្បីដើរក្នុងកម្រិតមួយដែលមានសុខភាពល្អលើសពីអ្វីដែលអ្នកធ្លាប់ជួបប្រទះពីមុនមក។
ប្រសិនបើអ្នក ឬកូនៗរបស់អ្នកបានធ្លាក់ខ្លួនឈឺដោយសារជំងឺផ្តាសាយរៀងរាល់ពីរបីសប្តាហ៍ម្តង ចូរដឹងថាព្រះមិនត្រឹមតែបានចាក់បញ្ចូលការព្យាបាល និងសុខភាពដ៏ល្អឥតខ្ចោះរបស់ទ្រង់ទៅក្នុងរូបកាយរបស់អ្នកប៉ុណ្ណោះទេ ប៉ុន្តែឥឡូវនេះទ្រង់ក៏កំពុងចាក់បង្ហូរប្រេងតាំងមកលើអ្នក និងក្រុមគ្រួសាររបស់អ្នក ដើម្បីដើរក្នុងនាមជាអ្នកមានជ័យជម្នះ និងជាឧបករណ៍លើកទឹកចិត្តដល់អ្នកដទៃជាច្រើនទៀត។ ចូរចាប់ផ្តើមអរព្រះគុណទ្រង់សម្រាប់រឿងនោះជារៀងរាល់ថ្ងៃ ដោយដឹងថាអ្វីដែលទ្រង់បានចាប់ផ្តើម ទ្រង់ផ្ទាល់អាចបញ្ចប់វាបាន (ភីលីព ១:៦)!
បងប្អូនជាទីស្រឡាញ់អើយ នៅក្នុងចំណុចខ្សោយរបស់អ្នក ជំនួសឲ្យការបាក់ទឹកចិត្តដោយសារអ្វីដែលមារសត្រូវកំពុងធ្វើនៅក្នុងជីវិតរបស់អ្នក ចូររៀនមើលអ្វីដែលព្រះអម្ចាស់កំពុងធ្វើនៅក្នុងជីវិតរបស់អ្នកតាមរយៈព្រះគុណរបស់ទ្រង់។ ធ្វើដូច្នេះមិនពិបាកពេកទេ។ ដូចដែលអ្នកបានឃើញហើយ អារក្សតែងតែតាមអ្នកប្រកៀកប្រកិត ដោយព្យាយាមបញ្ឈប់ ឬរំខានដល់អ្វីដែលព្រះបានចាប់ផ្តើមរួចហើយ ដោយការប្រឆាំង ឬធ្វើផ្ទុយពីអ្វីដែលព្រះកំពុងធ្វើ។ ដូច្នេះប្រសិនបើអ្នកចង់ឃើញអ្វីដែលព្រះកំពុងធ្វើនៅក្នុងជីវិតរបស់អ្នក គ្រាន់តែយកអ្វីដែលមារសត្រូវកំពុងធ្វើ ហើយវាយបកទៅពួកវាវិញ។
អត្ថបទនេះត្រូវបានសរសេរជាច្បាប់ដើម ជាភាសាអង់គ្លេសដោយគ្រូគង្វាល យ៉ូសែប ព្រីនស៍។
ធនធានបន្ថែមទៀតដែលដូចធនធាននេះ
ចូរប្រយ័ត្នចំពោះគ្រោះថ្នាក់នៃព្រះគុណក្លែងក្លាយ
យើងរស់នៅក្នុងសម័យកាលដ៏គួរឲ្យរំភើប។ ព្រះអម្ចាស់ព្រះយេស៊ូវគ្រីស្ទរបស់យើងពិតជាកំពុងស្ដារឡើងវិញនូវដំណឹងល...
ការយល់ដឹងអំពីសារៈសំខាន់នៃដើមអូលីវ និងប្រេងតាំង
នៅក្នុងព្រះគម្ពីរសញ្ញាចាស់ ព្រះបានជ្រើសយកប្រេងតាំងដើម្បីប្រទានព្រះពរដល់រាស្ត្ររបស់ទ្រង់។ ប៉ុន្តែ តើ...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ១/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
សេចក្តីសង្ឃឹមដែលមិនធ្វើឲ្យខកចិត្ត (ភាគទី ២/៣)
ចូរលះបង់គំនិតអវិជ្ជមាន ហើយចាប់ផ្តើមបង្កើតការរំពឹងទុកដោយទំនុកចិត្តចំពោះសេចក្តីល្អរបស់ព្រះសម្រាប់អ្នកជ...
ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ៣/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអ...
ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ២/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអ...
ជាវជាប្រចាំ