ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ៣/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអាចរកព្រះគុណដ៏បរិបូរហូរហៀររបស់ព្រះសម្រាប់អ្នកបាន ដើម្បីបំផ្លាស់បំប្រែអ្នក ឬស្ថានភាពរបស់អ្នកហួសពីអ្វីដែលអ្នកអាចស្រមៃដល់។ នៅក្នុងអត្ថបទជាស៊េរីដែលមានបីភាគនេះ លោកគ្រូយ៉ូសែប ព្រីនស៍ បង្ហាញអ្នកពីមូលហេតុដែលបំណងព្រះហឫទ័យព្រះនៅតែផ្គត់ផ្គង់ព្រះគុណរបស់ទ្រង់ដល់អ្នក ទោះបីជាអ្នកបានបរាជ័យក៏ដោយ និងរបៀបដែលអ្នកអាចទទួលបានព្រះគុណនោះ។ សូមស្វែងយល់ផងដែរអំពីរបៀបដែលព្រះនៅតែអាចប្រើអ្នកសម្រាប់សិរីល្អរបស់ទ្រង់បាន ទោះបីជាអ្នកធ្លាប់មានកំហុសពីអតីតកាលក៏ដោយ។
ព្រះគុណ ៖ ចម្លើយចំពោះភាពទន់ខ្សោយរបស់អ្នក
នៅពេលដែលអ្នកបើកចិត្តស្មោះត្រង់នឹងព្រះអម្ចាស់អំពីភាពទន់ខ្សោយ និងអសមត្ថភាពរបស់អ្នក ហើយអ្នកងាកទៅរកទ្រង់ដើម្បីសុំជំនួយ ទ្រង់នឹងនាំអ្នកចេញពីជ្រលងភ្នំរបស់អ្នក ទៅកាន់កន្លែងដែលមានសេរីភាព ការផ្គត់ផ្គង់ និងជ័យជម្នះ។ ទ្រង់នឹងសម្រាក ស្តារឡើងវិញ ហើយប្រទានព្រះពរដល់អ្នកលើសពីអ្វីដែលអ្នកអាចទូលសុំពីទ្រង់។ ព្រះគុណដ៏បរិបូរ និងឫទ្ធានុភាពនៃការធ្វើការអស្ចារ្យរបស់ព្រះយេស៊ូវ នឹងធ្វើសម្រាប់អ្នក នូវអ្វីដែលអ្នកមិនអាចធ្វើបានសម្រាប់ខ្លួនឯងបាន។
ព្រះគុណរបស់ទ្រង់គ្រប់គ្រាន់សម្រាប់អ្នក ហើយកម្លាំងរបស់ទ្រង់បានពេញខ្នាតនៅក្នុងភាពទន់ខ្សោយរបស់អ្នក។
អ្នកនឹងឃើញព្រះគុណរបស់ទ្រង់គ្រប់គ្រាន់សម្រាប់អ្នក ហើយកម្លាំងរបស់ទ្រង់បានពេញខ្នាតនៅក្នុងភាពទន់ខ្សោយរបស់អ្នក (២ កូរិនថូស ១២:៩)។ ខ្ញុំសូមចែករំលែកទីបន្ទាល់ដ៏មានអានុភាពមួយ ដែលបញ្ជាក់ពីសេចក្ដីពិតនេះ។
មានបងប្រុសជាទីស្រឡាញ់ម្នាក់មកពីប្រទេសនូវែលសេឡង់បានសរសេរសំបុត្រមកខ្ញុំដើម្បីចែករំលែកពីរបៀបដែលព្រះបានរំដោះគាត់ពីការញៀនរយៈពេលវែងមួយចំនួនដោយព្រះគុណរបស់ទ្រង់។ ទោះបីជាបន្ទាប់ពីគាត់បានទទួលការសង្គ្រោះរួចហើយក៏ដោយ បុរសម្នាក់នេះនៅតែបានតយុទ្ធជាមួយនឹងរឿងអាសអាភាស ការសម្រេចកាមដោយខ្លួនឯង និងការញៀនជាតិនីកូទីន។ គាត់ដឹងថាក្នុងនាមជាគ្រីស្ទបរិស័ទម្នាក់ គាត់មិនគួរធ្វើរឿងទាំងនេះទេ ដូច្នេះគាត់មានអារម្មណ៍ថាមានកំហុស មានទោស និងឃ្លាតឆ្ងាយពីព្រះយ៉ាងខ្លាំង។
គាត់ស្អប់ការរស់នៅក្នុងជីវិតពីរបែបនេះណាស់ ហើយបានព្យាយាមធ្វើអ្វីគ្រប់យ៉ាងដែលគាត់អាចធ្វើបាន ដើម្បីរំដោះខ្លួនចេញពីការញៀនទាំងនេះ។ ប៉ុន្តែ ទោះបីជាមានការខិតខំប្រឹងប្រែងយ៉ាងណាក៏ដោយ គាត់បរាជ័យម្តងហើយម្តងទៀតនៅពេលណាដែលគាត់លែងមានឆន្ទៈ។ អស់រយៈពេលជាង ១០ ឆ្នាំមកហើយ គាត់បានជាប់ស្ទះក្នុងសមរភូមិដែលពេញដោយការខកចិត្ត និងឯកោនេះ។
បន្ទាប់មក អ្វីៗបានចាប់ផ្តើមផ្លាស់ប្តូរសម្រាប់គាត់ នៅពេលដែលគាត់បានស្គាល់ និងបន្តទទួលបានព្រះគុណដ៏បរិបូរហូរហៀររបស់ព្រះ។ គាត់បានសរសេរថា ៖
លោកគ្រូ ព្រីនស៍ ព្រះបានធ្វើការអស្ចារ្យជាច្រើននៅក្នុងជីវិតរបស់ខ្ញុំ ចាប់តាំងពីខ្ញុំបានអានសៀវភៅ Destined To Reign របស់លោកគ្រូចប់។ ខ្ញុំធ្លាប់ជក់បារីមួយថ្ងៃមួយកញ្ចប់ ហើយបានព្យាយាមឈប់ជក់ជាច្រើនដង ប៉ុន្តែមិនទទួលបានជោគជ័យទេ។
ប៉ុន្តែ ក្នុងរយៈពេលពីរខែដែលបានអានសៀវភៅ Destined To Reign ខ្ញុំស្រាប់តែបាត់បង់ចំណង់ទាំងអស់ចំពោះបារី។ ខ្ញុំមិនចង់ជក់វាដូចពេលផ្សេងៗទៀត ដែលខ្ញុំព្យាយាមឈប់ជក់ចេញពីការខិតខំផ្ទាល់ខ្លួនរបស់ខ្ញុំទេ។ សូមថ្វាយសិរីល្អដល់ព្រះ!
ខ្ញុំបានព្យាយាមអស់រយៈពេលជាង ១០ឆ្នាំដើម្បីទទួលបានជ័យជម្នះ ហើយអ្វីដែលខ្ញុំត្រូវការនោះគឺត្រូវការស្គាល់សេចក្តីពិត និងត្រូវការសម្រាកនៅក្នុងកិច្ចការរបស់ព្រះយេស៊ូវនៅលើឈើឆ្កាងដែលបានចប់សព្វគ្រប់ហើយ។
តាមរយៈព្រះគុណរបស់ព្រះ ខ្ញុំក៏បានទទួលការរំដោះចេញពីការញៀនផ្លូវភេទរបស់ខ្ញុំផងដែរ។ ទោះបីជាវាត្រឹមតែក្នុងរយៈពេលខ្លីប្រហែលជាប្រាំបីសប្តាហ៍ក៏ដោយ វាពិតជាធំធេងណាស់សម្រាប់ខ្ញុំ ពីព្រោះនេះជាអ្វីមួយដែលខ្ញុំបានព្យាយាមយ៉ាងខ្លាំងដើម្បីយកឈ្នះ។ វាកើតឡើងដោយមិនបានខំប្រឹង។
ខ្ញុំគ្រាន់តែសម្រេចចិត្តសម្រាកនៅក្នុងកិច្ចការដែលព្រះយេស៊ូវបានធ្វើចប់សព្វគ្រប់ហើយ ការអត់ទោសរបស់ទ្រង់ ជ័យជម្នះរបស់ទ្រង់ ព្រះគុណរបស់ទ្រង់ និងសេចក្ដីស្រឡាញ់របស់ទ្រង់ ហើយរឿងអាសអាភាស និងការសម្រេចកាមដោយខ្លួនឯងឥឡូវនេះគ្មានអំណាច ឬការគ្រប់គ្រងលើខ្ញុំទេ។
វាពិតជាអស្ចារ្យណាស់ ជាពិសេសដោយសារតែខ្ញុំបានព្យាយាមអស់រយៈពេលជាងដប់ឆ្នាំមកហើយដើម្បីទទួលបានជ័យជម្នះ ហើយអ្វីដែលខ្ញុំត្រូវការនោះគឺត្រូវការស្គាល់សេចក្តីពិត និងត្រូវការសម្រាកនៅក្នុងកិច្ចការរបស់ព្រះយេស៊ូវនៅលើឈើឆ្កាងដែលបានចប់សព្វគ្រប់ហើយ។
នៅមិនទាន់អស់ទេ។ បន្ទាប់ពីគ្មានការងារធ្វើប្រហែលបួនខែមក បងប្រុសម្នាក់នេះក៏រកបានការងារថ្មីក្នុងផ្នែកលក់ដែលជាជំនាញរបស់គាត់ ហើយគាត់បានសន្មតថាព្រះពរនេះ ក៏ដូចជាការបំពេញការងារផ្នែកលក់ដ៏ល្អឥតខ្ចោះរបស់គាត់ គឺដោយសារតែព្រះគុណដែលមិនសមនឹងទទួលបានរបស់ព្រះអម្ចាស់។ សព្វថ្ងៃនេះ បងប្រុសម្នាក់នេះកំពុងរីករាយនឹងជីវិតដែលមានសេរីភាព សេចក្តីសុខសាន្ត និងការសម្រាក ៖
ឥឡូវនេះខ្ញុំយល់ពីអត្ថន័យនៃការស្ថិតនៅក្រោមព្រះគុណ និងរបៀបសម្រាកនៅក្នុងកិច្ចការដែលព្រះយេស៊ូវបានធ្វើចប់សព្វគ្រប់ហើយ។ ឥឡូវនេះ ជំនួសឲ្យការមានស្មារតីដឹងពីអំពើបាប ខ្ញុំតែងតែមានស្មារតីដឹងអំពីការអត់ទោសរបស់ខ្ញុំ ហើយខ្ញុំតែងតែប្រកាសថា ខ្ញុំជាសេចក្តីសុចរិតរបស់ព្រះនៅក្នុងព្រះគ្រីស្ទ។
ខ្ញុំតែងតែចាត់ទុកសេចក្តីសុចរិតដូចជារង្វាន់ ហើយ បានព្យាយាមរកវាឲ្យបានតាមរយៈការប្រព្រឹត្តរបស់ខ្ញុំ ប៉ុន្តែឥឡូវនេះខ្ញុំដឹងថា ខ្ញុំបានទទួលអំណោយទាននៃសេចក្តីសុចរិតតាមរយៈកិច្ចការរបស់ព្រះយេស៊ូវនៅលើឈើឆ្កាង។
ការដឹងថាព្រះគុណរបស់ព្រះធំជាងអំពើបាបរបស់ខ្ញុំ ហើយការដឹងថាខ្ញុំលែងត្រូវតយុទ្ធដើម្បីជ័យជម្នះទៀតហើយ ប៉ុន្តែខ្ញុំអាចសម្រាកនៅក្នុងជ័យជម្នះរបស់ទ្រង់ និងសោយរាជ្យក្នុងជីវិត បានប្រទានសិទ្ធិអំណាចដល់ខ្ញុំ ហើយពិតជាអស្ចារ្យណាស់… ថ្ងៃនេះខ្ញុំមានសេចក្តីសុខសាន្តនៅក្នុងខ្លួន ដែលខ្ញុំមិនធ្លាប់មានពីមុនមក។ ខ្ញុំមានអារម្មណ៍ថាមានសេរីភាព ហើយមានការរំពឹងទុកដោយទំនុកចិត្តថាមានតែរឿងល្អៗប៉ុណ្ណោះដែលនឹងចូលមករកខ្ញុំ!
បងប្អូនជាទីស្រឡាញ់អើយ នោះគឺជាអំណាចនៃជំនឿដ៏ត្រឹមត្រូវ។ នៅពេលដែលបងប្រុសម្នាក់នេះបានឮ ហើយជឿលើសេចក្ដីពិតអំពីព្រះគុណរបស់ព្រះ វាបានបង្កើតឲ្យមានរបៀបរស់នៅប្រកបដោយភាពបរិសុទ្ធ ដែលឆន្ទៈទាំងអស់ ការថ្កោលទោសខ្លួនឯង និងការខិតខំប្រឹងប្រែងដោយខ្លួនឯងរបស់គាត់មិនអាចសម្រេចបាន។ នោះគឺជាអំណាចនៃដំណឹងល្អ!
ដូចជាបងប្រុសម្នាក់នេះដែរ ប្រសិនបើអ្នកចង់ឃើញកម្លាំងរបស់ព្រះបានពេញខ្នាតនៅក្នុងភាពទន់ខ្សោយរបស់អ្នក នោះខ្ញុំសូមលើកទឹកចិត្តអ្នកឲ្យបន្តស្តាប់ និងរីកចម្រើននៅក្នុងការបើកសម្តែងរបស់អ្នកអំពីព្រះគុណដ៏បរិបូររបស់ព្រះ។
ហើយនៅពេលដែលអ្នកធ្វើដូច្នេះ សូមមើលឃើញខ្លួនអ្នកដើរដោយមានជ័យជម្នះលើភាពទន់ខ្សោយរបស់អ្នក។ សូមមើលឃើញខ្លួនអ្នកដើរក្នុងសេរីភាពរបស់ព្រះយេស៊ូវ មានសេរីភាពពីនឹមនៃការជាប់ចំណងនោះ ហើយលែងមានបំណងចិត្តចង់បានវាទៀតហើយ ដូចជាបងប្រុសជាទីស្រឡាញ់ម្នាក់នេះដែរ។ សូមមើលឃើញខ្លួនអ្នកបានបំផ្លាស់បំប្រែ ហើយដើរក្នុងនាមជាមនុស្សថ្មីដែលមានបំណងចិត្តថ្មី ពេញដោយការគោរពបម្រើព្រះ ដើម្បីថ្វាយសិរីល្អដល់ព្រះនៅក្នុងរូបកាយ និងជីវិតរបស់អ្នក!
ដោយព្រះគុណតាមរយៈសេចក្ដីជំនឿ
មិនថាអ្នកកំពុងឆ្លងកាត់ពេលវេលាដ៏លំបាក ឬកំពុងដោះស្រាយជាមួយនឹងភាពទន់ខ្សោយនៅក្នុងខ្លួនអ្នកទេ ព្រះចង់ឲ្យអ្នកយល់ថា ពេលដែលអ្នកទន់ខ្សោយ ទើបអ្នករឹងមាំតាមរយៈព្រះគុណរបស់ទ្រង់ និងអំណាចនៃការធ្វើការអស្ចារ្យរបស់ព្រះគ្រីស្ទ (២ កូរិនថូស ១២:១០)។
កាលណាយើងទទួលបានព្រះគុណរបស់ទ្រង់កាន់តែច្រើន ហើយអរព្រះគុណទ្រង់សម្រាប់ព្រះគុណនោះ ទើបយើងទទួលបទពិសោធអំពីព្រះគុណរបស់ទ្រង់ដែលមានយ៉ាងបរិបូរហូរហៀរកាន់តែច្រើននៅក្នុងផ្នែកដែលទន់ខ្សោយរបស់យើង។
កាលណាមានភាពទន់ខ្សោយ ការវាយប្រហារ ឬអំពើបាបកាន់តែច្រើន នោះព្រះគុណដ៏បរិបូររបស់ទ្រង់កាន់តែចម្រើឡើងដើម្បីផ្គត់ផ្គង់ រំដោះ និងបំផ្លាស់បំប្រែអ្នក រហូតដល់ផ្នែកដែលជាចំណុចខ្សោយនោះក្លាយជាឧទាហរណ៍នៃសេចក្តីល្អ ព្រះគុណ និងផែនការដ៏អស្ចារ្យរបស់ទ្រង់សម្រាប់អ្នកដោយមិនអាចប្រកែកបាន។
ផ្នែករបស់យើងគឺគ្រាន់តែបន្តសម្លឹងមើលទៅព្រះយេស៊ូវ បន្តជញ្ជឹងគិតអំពីកិច្ចការដែលទ្រង់បានបញ្ចប់ ហើយនឹងបន្តមើលឃើញដោយជំនឿពីការបំផ្លាស់បំប្រែដែលយើងចង់ជួប។ កាលណាយើងទទួលបានព្រះគុណរបស់ទ្រង់កាន់តែច្រើន ហើយអរព្រះគុណទ្រង់សម្រាប់ព្រះគុណនោះ ទើបយើងទទួលបទពិសោធអំពីព្រះគុណរបស់ទ្រង់ដែលមានយ៉ាងបរិបូរហូរហៀរកាន់តែច្រើននៅក្នុងផ្នែកដែលទន់ខ្សោយរបស់យើង
បងប្អូនជាទីស្រឡាញ់អើយ ចូរយើងបញ្ឈប់ការខិតខំប្រឹងប្រែងទាំងអស់ដោយខ្លួនឯង ហើយកុំស្ទាក់ស្ទើរក្នុងការប្រគល់ភាពទន់ខ្សោយរបស់យើងទៅព្រះ និងព្រះគុណដែលបំផ្លាស់បំប្រែរបស់ទ្រង់។ នៅពេលដែលយើងជ្រើសរើសជឿថាព្រះគុណរបស់ទ្រង់បានស្រាយរួចហើយនៅក្នុងកម្រិតដ៏លើសលប់ នៅក្នុងការល្បងល និងក្នុងផ្នែកដែលជាចំណុចខ្សោយរបស់យើង ព្រះគុណដ៏បរិបូរហូរហៀរនេះនឹងរំដោះ ហើយនឹងបំផ្លាស់បំប្រែយើងយ៉ាងខ្លាំង សម្រាប់សិរីល្អដ៏អស្ចារ្យបំផុតរបស់ទ្រង់!
អត្ថបទនេះត្រូវបានសរសេរជាច្បាប់ដើម ជាភាសាអង់គ្លេសដោយគ្រូគង្វាល យ៉ូសែប ព្រីនស៍។
ធនធានបន្ថែមទៀតដែលដូចធនធាននេះ
ចូរប្រយ័ត្នចំពោះគ្រោះថ្នាក់នៃព្រះគុណក្លែងក្លាយ
យើងរស់នៅក្នុងសម័យកាលដ៏គួរឲ្យរំភើប។ ព្រះអម្ចាស់ព្រះយេស៊ូវគ្រីស្ទរបស់យើងពិតជាកំពុងស្ដារឡើងវិញនូវដំណឹងល...
សេចក្ដីសុចរិតជាអំណោយ
អ្នកមិនអាចទទួលបានព្រះពរពីព្រះតាមរយៈការប្រព្រឹត្តល្អរបស់អ្នកឡើយ។ ព្រះពរទាំងអស់របស់ទ្រង់ រួមទាំងព្រះព...
ការយល់ដឹងអំពីសារៈសំខាន់នៃដើមអូលីវ និងប្រេងតាំង
នៅក្នុងព្រះគម្ពីរសញ្ញាចាស់ ព្រះបានជ្រើសយកប្រេងតាំងដើម្បីប្រទានព្រះពរដល់រាស្ត្ររបស់ទ្រង់។ ប៉ុន្តែ តើ...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ២/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
ការយកឈ្នះលើសមរភូមិនៃចិត្តគំនិតរបស់អ្នក (ភាគទី ១/៣)
ការរំដោះខ្លួនចេញពីការសង្កត់សង្កិនផ្លូវចិត្ត និងគំនិតអវិជ្ជមាន ហើយចាប់ផ្តើមរស់នៅជីវិតដ៏បរិបូរ ដែលពោ...
ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ២/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអ...
ព្រះគុណដ៏បរិបូរហូរហៀរសម្រាប់ជីវិតរបស់អ្នក (ភាគទី ១/៣)
ប្រសិនបើអ្នកមានអារម្មណ៍ថាបាក់ទឹកចិត្ត និងមានបន្ទុកដោយសារចំណុចខ្វះខាតដែលអ្នកមាន សូមកុំបារម្ភអី! អ្នកអ...
ជាវជាប្រចាំ